Gjiganti gjerman i automjeteve, Volkswagen, do të mbyllë një fabrikë prodhimi në Gjermani për herë të parë në historinë e tij 88-vjeçare.
Në vitin 2024, Volkswagen arriti një marrëveshje me këshillin e punës dhe sindikatën për të pushuar nga puna 35 000 punonjës dhe për të reduktuar kapacitetin prodhues në Gjermani, si përgjigje ndaj konkurrencës në rritje nga prodhuesit kinezë, rënies së kërkesës në tregun evropian dhe adoptimit më të ngadaltë se sa ishte parashikuar të automjeteve elektrike.
Si pjesë e kësaj marrëveshjeje, prodhimi i automjeteve të Volkswagen në Dresden, kryeqytetin e landit lindor gjerman të Saksonisë, do të ndërpritet deri në fund të këtij viti.
Kompania do të ndalojë prodhimin e automjeteve në fabrikën e saj në Dresden të martën, duke shënuar për herë të parë në historinë e saj 88-vjeçare mbylljen e një strukture prodhimi në Gjermani.
Mbyllja e fabrikës në Dresden vjen në një periudhë kur Volkswagen po përballet me vështirësi në rrjedhën e parasë, si pasojë e shitjeve të dobëta në Kinë, rënies së kërkesës në Evropë dhe presionit mbi shitjet në SHBA për shkak të tarifave. Kompania duhet të financojë investime prej rreth 160 miliardë eurosh (187.9 miliardë dollarë) gjatë pesë viteve të ardhshme.
Fabrika e Volkswagen në Dresden ka prodhuar më pak se 200 000 automjete që nga fillimi i prodhimit në vitin 2002.
Kompania e kishte pozicionuar fabrikën e Dresdenit si një model kryesor, që demonstronte aftësitë teknologjike dhe prodhuese të saj në atë periudhë. Fillimisht aty u prodhua modeli Phaeton dhe më pas ID.3. Megjithatë, asnjëri prej këtyre modeleve nuk kontribuoi ndjeshëm në suksesin tregtar të Volkswagen.
Mbyllja e kësaj fabrike shihet si një hap i kufizuar, por i domosdoshëm, për mbijetesën e Volkswagen në kushtet e konkurrencës së ashpër nga Kina, tarifave amerikane, burokracisë së tepërt në Gjermani, kostove të larta të energjisë, të drejtave të gjera të punonjësve dhe burokracisë së brendshme të konsideruar të pashembullt.
