Vjedhjet nëpër dyqane i kushtuan sektorit të shitjes me pakicë në Gjermani afro 3 miliardë euro në vitin 2024, një rekord i ri që, sipas raportit të Institutit EHI për Shitjen me Pakicë, u ndikua pjesërisht nga krimi i organizuar. Për më tepër, qeveria gjermane humbi miliona euro në të ardhura nga taksat.
Inventarët e kryer nga shitësit me pakicë zbuluan mungesë mallrash në vlerë 4.95 miliardë euro në vitin 2024. Edhe pse humbjet totale janë rritur me 3% krahasuar me një vit më parë, vetëm rreth 4.2 miliardë euro janë të lidhura drejtpërdrejt me vjedhje. Pjesa tjetër i atribuohet gabimeve të brendshme të kompanive, siç janë çmimet e pasakta apo gabimet në regjistrim dhe vlerësim.
Në anketën e kryer morën pjesë 98 kompani, që operojnë mbi 17,000 dyqane në të gjithë Gjermaninë.
Sipas raportit, vetëm vjedhjet nga klientët, përfshirë ato nga grupet kriminale, i kushtuan sektorit rreth 2.95 miliardë euro, nga 2.82 miliardë euro një vit më parë. Vjedhjet nga punonjësit e vetë kompanive shkaktuan një humbje prej 890 milionë euro, ndërsa vjedhjet nga furnitorët dhe kompanitë e shërbimeve sollën një humbje prej 370 milionë euro.
98% e vjedhjeve kalojnë pa u zbuluar
Edhe pse raportet e policisë tregojnë një ulje prej 5% të rasteve të raportuara të vjedhjeve në vitin 2024, EHI thekson se 98% e rasteve të vjedhjeve mbeten të pazbuluara, dhe identifikimi i humbjeve bëhet vetëm përmes krahasimit të inventarëve.
Krimi i organizuar po luan rol gjithnjë e më të madh
Raporti vë në dukje se vjedhjet e organizuara janë rritur me 5% krahasuar me vitin e kaluar, duke përbërë rreth një të tretën e të gjitha vjedhjeve nga klientët, me një dëm ekonomik që i afrohet 1 miliard eurove.
“Shumë shitës janë të bindur se vjedhjet e organizuara po bëhen gjithnjë e më profesionale dhe do të vazhdojnë të shtohen,” thuhet në raport. Ai thekson gjithashtu:
“Grupe të mëdha hyjnë në dyqane dhe marrin mallrat në mënyrë brutale. Siguria dhe stafi nuk kanë mundësi ndërhyrjeje. Krimi i organizuar në rritje, lidhjet me platformat e mëdha online dhe mungesa e veprimit ndaj tyre përbëjnë probleme të mëdha.”
Varfëria, një tjetër faktor shtytës
Raporti përmend se edhe vjedhjet e zakonshme nga klientët e përditshëm përbëjnë sfidë të veçantë, të nxitura nga rritja e kostove të jetesës dhe papunësia.
Gjermania, si ekonomia më e madhe e BE-së, po përballet me çmime të larta energjie dhe rënie produktiviteti, pjesërisht për shkak të luftës në Ukrainë dhe pandemisë COVID-19. Ekonomia ka pësuar tkurrje në çdo tremujor të dytë që nga fundi i vitit 2022.
Kostoja e banimit është rritur ndjeshëm: 12% e popullsisë shpenzoi mbi 40% të të ardhurave për strehim në vitin 2023 (mesatarja e BE-së është 8.2%). Një në pesë persona në Gjermani rrezikon varfërinë apo përjashtimin social, ndërsa papunësia ka arritur në 6.2%, niveli më i lartë që nga fundi i vitit 2020, me numrin e të papunëve që i afrohet 3 milionëve – për herë të parë në një dekadë.
Ku ndodhin më shpesh vjedhjet?
Dyqanet ushqimore janë më të prekura, me mallra të vjedhura me vlerë afro 2 miliardë euro. Supermarketet më të vogla janë më të prekura. Rritje të ndjeshme të vjedhjeve kanë shënuar edhe farmacitë dhe dyqanet e materialeve ndërtimore.
Statistikat zyrtare të policisë tregojnë një rënie prej 5% të rasteve të raportuara në vitin 2024, pas dy rritjeve dramatike në vitet 2022 dhe 2023 (me +34.3% dhe +23.6%). Sidoqoftë, EHI thekson se pothuajse të gjitha rastet nuk raportohen.
Humbjet për buxhetin shtetëror
Nga vjedhjet që sollën humbje prej 4.2 miliardë euro, buxheti federal humbi rreth 570 milionë euro nga TVSH-ja, bazuar në përllogaritjen që 75% e mallrave të vjedhura kanë normë tatimi 19% dhe 25% të mbeturën prej 7%.
Rritje e shpenzimeve për sigurinë
Kompanitë e shitjes me pakicë shpenzojnë rreth 0.33% të qarkullimit për masa sigurie, përfshirë: trajnimin e stafit, kamerat e sigurisë, detektivë të dyqaneve dhe pajisje kundërvjedhjes. Investimet totale për siguri në vitin 2024 arritën në 3.1 miliardë euro, ndërsa kostoja totale e vjedhjeve dhe parandalimit shkoi në 7.3 miliardë euro.
Sipas raportit, kjo kosto përbën rreth 1.5% të çmimit për blerje mesatare, që do të thotë se edhe konsumatorët e ndershëm po e paguajnë faturën e vjedhjeve./Përshtati nga Euronews, ekofin.al
