Visa ka prezantuar Visa Threat Intelligence Platform (VTIP), një zgjidhje e re e dedikuar institucioneve financiare, e cila u mundëson atyre të identifikojnë më herët kërcënimet kibernetike dhe të reagojnë më me efikasitet për të parandaluar mashtrimet dhe humbjet financiare. Platforma bazohet në të njëjtat kapacitete të sigurisë kibernetike që Visa përdor për të mbrojtur rrjetin e saj global.
Mashtrimet shpesh janë pasojë e incidenteve të mëparshme kibernetike dhe shpesh fillojnë me komprometimin e të dhënave, vjedhjen e kredencialeve ose keqpërdorimin e sistemeve, shumë përpara se të ndodhë vetë transaksioni . Sulmet që çojnë në komprometimin e të dhënave të pagesave mund të vijnë nga çdo pjesë e ekosistemit të pagesave, nga tregtarët dhe emetuesit e kartave, deri te pranuesit, procesorët dhe ofruesit e shërbimeve. Në disa raste, këto të dhëna të komprometuara më pas shiten dhe keqpërdoren, duke shkaktuar humbje financiare dhe ndërprerje të biznesit.
“Sulmet kibernetike po bëhen gjithnjë e më të shpeshta, më të sofistikuara dhe gjithnjë e më të vështira për t’u zbuluar në kohë, ndërsa pasojat shpesh shfaqen vetëm më vonë, kur ndodh vetë mashtrimi. Visa Threat Intelligence Platform ndihmon institucionet financiare t’i identifikojnë këto kërcënime shumë më herët, duke bashkuar në një vend njohuritë nga fusha e sigurisë kibernetike dhe e pagesave. Në këtë mënyrë, ato marrin informacion më të qartë dhe më konkret që u ndihmon të reagojnë përpara se rreziku të shndërrohet në humbje reale”, deklaroi Walter Lironi, nënkryetar i lartë dhe drejtues i sektorit të shërbimeve me vlerë të shtuar për rajonin e Evropës Qendrore dhe Lindore, Lindjen e Mesme dhe Afrikën (CEMEA) në kompaninë Visa.
Zgjidhje e bazuar në kapacitetet globale të Visa për mbrojtje kibernetike
Visa çdo muaj bllokon rreth 90 milionë sulme kibernetike dhe 11 milionë e-maile të ashtuquajtura phishing në më shumë se 200 vende, duke u mbështetur në një qasje të bazuar në mbrojtje maksimale dhe funksionim të pandërprerë të sistemeve . VTIP është zhvilluar brenda ekipit të kompanisë Visa për mbrojtje kibernetike dhe është testuar në kushte reale brenda rrjetit global të pagesave të Visa. Në këtë mënyrë, klientëve u është bërë i disponueshëm i njëjti lloj informacioni inteligjent që përdoret për mbrojtjen e një prej rrjeteve më të mëdha të pagesave në botë.
Si përdoruesi i parë i zgjidhjes së vet, Visa e ka testuar VTIP në kushte reale përpara se ta bënte të disponueshëm në treg, me qëllim që të ndihmojë edhe aktorët e tjerë të ekosistemit të përgatiten më mirë ndaj formave të reja të sulmeve.
Zhvilluar posaçërisht për nevojat e sektorit financiar
VTIP është dizajnuar posaçërisht për institucionet financiare, me qëllim që t’u ndihmojë ekipeve të sigurisë kibernetike, menaxhimit të rrezikut dhe parandalimit të mashtrimeve të lidhin më lehtë të dhënat nga burime të ndryshme dhe të fokusohen në njohuri që lidhen drejtpërdrejt me rreziqet në pagesa. Platforma bashkon të dhëna nga fusha e sigurisë kibernetike dhe ajo financiare, duke u mundësuar organizatave të lidhin më qartë incidentet e sigurisë me pasojat e mundshme në formën e mashtrimeve.
Mundësitë e platformës VTIP përfshijnë: Njohuri mbi kërcënimet – Tregues të komprometimit të lidhur me malware, të përshtatur sipas nevojave të sektorit financiar;
Njohuri mbi dobësitë – Pasqyrë mbi dobësitë dhe mënyrat e mundshme të shfrytëzimit të tyre, relevante për organizatën konkrete; Monitorim i abuzimit të brendit – Mbështetje për zbulimin dhe zbutjen e keqpërdorimit dhe imitimit të markës; Mbrojtje e identitetit digjital – Monitorim dhe mbrojtje e drejtuesve dhe punonjësve nga sulme të synuara; Njohuri financiare – Identifikim i të dhënave të komprometuara të pagesave në dark web dhe lidhja e tyre me njohuritë nga rrjeti VisaNet, duke i shndërruar të dhënat bruto në informacione të dobishme për ekipet e parandalimit të mashtrimeve dhe menaxhimit të rrezikut
Duke bashkuar njohuritë nga fusha e sigurisë kibernetike dhe e mashtrimeve, VTIP ndihmon institucionet financiare të identifikojnë më herët rreziqet, të përcaktojnë më me efikasitet prioritetet e reagimit dhe të ulin gjasat që incidentet kibernetike të shndërrohen në humbje financiare të shkaktuara nga mashtrimet.
Forcimi i besimit në ekosistemin e pagesave
Visa prej vitesh ka një rol të rëndësishëm në mbrojtjen e pagesave digjitale, ndërsa në pesë vitet e fundit ka investuar më shumë se 13 miliardë dollarë në teknologji, përfshirë investime të drejtuara në uljen e mashtrimeve dhe përmirësimin e sigurisë së rrjetit. Gartner Consulting i ka dhënë kompanisë Visa vlerësimin më të lartë (4,9) mes kompanive të krahasueshme për nivelin e përgjithshëm të zhvillimit të programit të saj të sigurisë kibernetike.
Në një kohë kur rreziqet kibernetike po bëhen gjithnjë e më komplekse, institucioneve financiare u nevojiten gjithnjë e më shumë njohuri inteligjente për kërcënimet, të përshtatura sipas specifikave të sektorit të pagesave. Duke u mundësuar klientëve akses në kapacitetet e veta tashmë të provuara për siguri kibernetike përmes VTIP, Visa vazhdon të ndihmojë institucionet financiare të reagojnë më herët ndaj kërcënimeve, të ulin rrezikun e mashtrimeve dhe të forcojnë më tej besimin në ekosistemin e pagesave.
