Ministria e Drejtësisë ka depozituar në Kuvend Projektligjin i cili i hap rrugë Vetting-ut të noterëve. Bëhet fjalë për një process rivlerësimi të ngjashëm me atë të gjyqtarëve e prokurorëve. Ata do t;i nënshtrohen hetimeve të thelluara nëse ekzistojnë indicia për përfitime të padrejta financiare, kontakte të papërshtatshme, dhurata apo favore në kundërshtim me standardet profesionale që përcakton ligji për Noterinë.
Në ligj shtohet një pikë: “Integriteti dhe besueshmëria profesionale”, tërësia e veprimeve, mosveprimeve ose sjelljeve që sigurojnë mungesën e dyshimit të arsyeshëm, të bazuar në indicie, të dhëna ose fakte të besueshme për mbajtjen e kontakteve të papërshtatshme të të interesuarit ose kandidatit për noter me persona të përfshirë në krimin e organizuar ose në kryerjen e veprave të rënda penale, si dhe mungesën e sjelljeve të rënda të papërshtatshme etike e morale që cenojnë besimin e publikut në sistemin noterial.”.
Në qendër të vëmendjes do të jenë:
- a) Përdorimi i paligjshëm i statusit të noterit, me qëllim krijimin e përfitimeve për vete ose për të tjerët;
- b) Përfitimi i padrejtë, në mënyrë të drejtpërdrejtë ose të tërthortë I dhuratave, favoreve, premtimeve ose trajtimeve preferenciale të çfarëdo lloji, të cilat jepen për shkak të funksionit që ushtron ose si rrjedhojë e shfrytëzimit të pozicionit të noterit, edhe në rastin kur formalizohen me një veprim juridik;
- c) Raste të tjera të sjelljes së rëndë të papërshtatshme etike dhe morale që cenon besimin e publikut në sistemin noterial, të kryera jashtë ushtrimit të detyrës.”.
Projektligji përcakton se Ministri i Drejtësisë vendos që i interesuari nuk kalon procesin e verifikimit të integritetit dhe besueshmërisë profesionale kur:
- a) subjekti i verifikimit ka kontakte të papërshtatshme me persona të
përfshirë në krimin e organizuar ose në kryerjen e veprave të rënda penale;
- b) ka shfaqur sjellje të rënda të papërshtatshme etike dhe morale që cenojnë besimin e publikut në sistemin noterial; ose
- c) ka ndonjë shkak tjetër përjashtues, sipas përcaktimit të legjislacionit në fuqi.
