Ministri i Mbrojtjes, Pirro Vengu zhvilloi një takim me përfaqësues nga shoqatat e ish-ushtarakëve në kuadër të konsultimit publik për projektligjin “Për statusin e ushtararakut”.
Drafti, i cili është hedhur për konsultim publik në fund të janarit, parashikon nga 15 deri në 25 paga shpërblim për ushtarakët aktivë që ndërpresin shërbimin për arsye të ndryshme. Sipas parashikimeve ligjore, ushtarët dhe detarët marrin deri në 15 paga, nënoficerët 20 paga dhe oficerët deri në 25 paga.
Ministri i Mbrojtjes theksoi se synimet janë për t’i bërë Forcat e Armatosura më tërheqëse për të rinjtë, ndërsa premtoi se pagat për 4 vitet e ardhshme do të jenë sipas standardeve të NATO-s.
“Krahasuar me 10 vite më parë ne kemi pesëfishuar rekrutimet. Në Akademinë FA kemi 1100 aplikime për 100 të rekrutuar. Kishim pagat më të ulëta në rajon tani kemi pagat më të larta në rajon dhe synimi është që për 4-vjeçarin e ardhshëm të rrisim pagat sipas standardeve të NATO-s”, nënvizoi Vengu.
Ministri theksoi gjithashtu se përmes ndryshimeve ligjore ata duan të rrisin mbështetjen për ata ushtarakë në rezervë dhe në lirim.
Nga ana e tyre, përfaqësuesit e ushtarakëve parashtruan një sërë shqëetësimesh, që nga trajtimi mjekësor, strehimi dhe krijimi i shtëpive të oficerëve.
Në draft, parashikohet që përveç kredisë për strehim, ushtarakëve t’u jepet në përdorim edhe banesë në objektet e ndërtuara për qëllime strehimi nga Ministria e Mbrojtjes. Gjithashtu, parashikohet që ushtaraku i dërguar për stërvitje, trajnim dhe kurse jashtë vendit, përveç trajtimit financiar, përfiton dietë ditore për mbulimin e shpenzimeve vetjake. Nga ana tjetër, fëmijëve të ushtarakëve të rënë në detyrë shteti u jep bursë të plotë nëse fitojnë të drejtën për studime të larta në institucione publike.
