Transporti urban në Tiranë, Vorë dhe Kamëz do të operojë me 50% të flotës së urbanëve, ndërkohë që një ditë pas këtij vendimi, Unioni i Transportit Publik i bën thirrje qeverisë që të marrë parasysh kërkesat e tyre ekonomike, për t’i shpëtuar nga kolapsi.
Që prej rifillimit të operimit pas bllokimit si pasojë e COVID-19 shoqatat e transportit kanë kërkuar mbështetje financiare nga qeveria, si një formë për shpëtimin e tyre nga falimentimi, duke përfshirë heqjen e akcizës së naftës, uljen e TVSH-së nga 20 në 6% si dhe faljen e taksave lokale. Ndërkaq, përveç pandemisë, rritja e çmimit të karburantit po i shkakton një tjetër goditje këtij sektori.
Për këtë arsye, në një letër dërguar bashkisë së Tiranës në 13 tetor 2021, shoqatat kërkojnë kompesim për çdo biletë në vlerën 30 lekë, pasi sipas tyre kostoja që kanë shoqëritë e transportit për një udhëtar nga 27-28 lekë që ka qenë ka arritur në 32-33 lekë. Po ashtu, kërkohet kompesimi në masën 600 lekë nga shteti për çdo abone të linjës apo të përgjithshme që shitet.
