Administrata Trump po shqyrton mundësinë që të kërkojë nga të gjithë studentët e huaj që aplikojnë për të studiuar në SHBA të nënshtrohen një verifikimi të rrjeteve sociale – një zgjerim i ndjeshëm krahasuar me përpjekjet e mëparshme, sipas një telegrami diplomatik të siguruar nga POLITICO.
Në përgatitje të këtij verifikimi të detyrueshëm, administrata po urdhëron ambasadat dhe seksionet konsullore të SHBA-së që të ndalojnë planifikimin e intervistave të reja për aplikantët për viza studentore, thuhet në dokumentin e datës së martë, të nënshkruar nga Sekretari i Shtetit Marco Rubio.
Nëse plani zbatohet, ai mund të ngadalësojë ndjeshëm përpunimin e vizave studentore. Kjo mund të ketë ndikim negativ te shumë universitete amerikane që mbështeten në studentët e huaj për të përforcuar të ardhurat e tyre financiare.
“Me efekt të menjëhershëm, në përgatitje të një zgjerimi të kontrollit të detyrueshëm të rrjeteve sociale, seksionet konsullore nuk duhet të shtojnë kapacitetin për takime të reja për viza studentore ose vizitorë shkëmbimi (F, M dhe J) deri në njoftimin e mëtejshëm,” – thuhet në telegram. (Shënim: “septel” është term i Departamentit të Shtetit për “telegram të veçuar”).
Administrata më herët kishte vendosur disa kërkesa për kontroll në rrjete sociale, por ato kishin si synim kryesisht studentët që ktheheshin në SHBA dhe që mund të kishin marrë pjesë në protesta kundër veprimeve të Izraelit në Gaza.
Telegrami nuk specifikon qartë se çfarë do të kontrollohet në rrjetet sociale në të ardhmen, por i referohet urdhrave ekzekutivë që kanë për qëllim ndalimin e terroristëve dhe luftimin e antisemitizmit.
Shumë zyrtarë të Departamentit të Shtetit kanë shprehur privatisht pakënaqësi për udhëzimet e kaluara, të cilat i kanë konsideruar si të paqarta. Për shembull, nuk është e qartë nëse postimi i një fotografie me flamurin palestinez në një llogari në X (ish-Twitter) mund ta detyrojë një student të përballet me kontroll shtesë.
Administrata Trump ka përdorur një sërë masash për të shënjestruar universitetet, veçanërisht ato elitare si Harvardi, të cilat i konsideron si shumë liberale dhe i akuzon për lejimin e antisemitizmit në kampuset e tyre. Njëkohësisht, ajo po zbaton masa të ashpra ndaj emigracionit, të cilat kanë përfshirë edhe një numër studentësh.
Zëdhënës të Departamentit të Shtetit nuk kanë komentuar menjëherë për këtë çështje. Një përfaqësues i organizatës NAFSA: Shoqata e Edukatorëve Ndërkombëtarë gjithashtu ka refuzuar të komentojë menjëherë./Përshtati nga Politico.com, ekofin.al
