Transporti ajror i pasagjerëve në Shqipëri vijoi të zgjerohej gjatë vitit 2025, por rritja e numrit të udhëtarëve ishte dukshëm më e lartë se ajo e lëvizjeve të avionëve në aeroporte. Sipas INSTAT, numri i pasagjerëve u rrit me 8,7%, ndërsa ulje-ngritjet e avionëve u shtuan me vetëm 2,3%, një diferencë që tregon se për çdo lëvizje avioni është transportuar mesatarisht një numër më i madh udhëtarësh.
Të dhënat e raportit “Transporti në Shifra 2025” tregojnë se numri i përgjithshëm i hyrjeve dhe daljeve të pasagjerëve përmes transportit ajror arriti në 11.640.070, nga 10.708.995 në vitin 2024.
Kjo përfaqëson një shtim prej 931.075 pasagjerësh brenda një viti.
Rritja u regjistrua si në hyrje, ashtu edhe në dalje. Numri i pasagjerëve të hyrë përmes transportit ajror arriti në 5,82 milionë, me rritje 9%, ndërsa daljet arritën gjithashtu në rreth 5,82 milionë, me rritje 8,4%.
Krahasuar me vitin 2023, kur përmes transportit ajror u regjistruan 7,28 milionë pasagjerë, fluksi është rritur me rreth 60% brenda dy viteve.
Më shumë pasagjerë për çdo lëvizje avioni
Ndryshe nga rritja e fortë e numrit të pasagjerëve, ulje-ngritjet e avionëve regjistruan një zgjerim shumë më të moderuar.
Në vitin 2025 u kryen 70.124 ulje-ngritje, nga 68.578 në vitin 2024, me një rritje prej rreth 2,3%.
Raporti midis numrit të pasagjerëve dhe ulje-ngritjeve tregon se gjatë vitit 2025 u regjistruan mesatarisht rreth 166 pasagjerë për çdo lëvizje avioni, nga rreth 156 në vitin 2024.
Kjo shifër përfaqëson një rritje prej rreth 6,3% të treguesit mesatar.
Ndryshimi mund të lidhet me përdorimin e avionëve me kapacitete më të mëdha, me shtimin e pasagjerëve për fluturim ose me një kombinim faktorësh. Megjithatë, raporti nuk jep të dhëna mbi numrin e vendeve të ofruara apo normën e mbushjes së avionëve, ndaj nuk lejon të përcaktohen shkaqet e këtij ndryshimi.
Rritet edhe trafiku i avionëve që kalojnë mbi Shqipëri
Përveç lëvizjeve në aeroporte, gjatë vitit 2025 u zgjerua edhe trafiku ajror që përshkon hapësirën shqiptare.
Sipas INSTAT, numri i mbikalimeve arriti në 334.275, nga 304.760 në vitin 2024, duke shënuar rritje prej 9,7%.
Në krahasim me vitin 2023, kur regjistroheshin 254.886 mbikalime, rritja ishte rreth 31,1%.
Në total, gjatë vitit 2025 në hapësirën ajrore shqiptare u regjistruan 404.399 lëvizje avionësh, duke përfshirë mbikalimet dhe ulje-ngritjet.
Raporti tregon gjithashtu se në transportin ajror kanë operuar 32 shoqëri ajrore, nga të cilat 31 të huaja dhe vetëm një shqiptare.
Transporti ajror i mallrave rritet me 24,4%
Zgjerimi i sektorit ajror nuk është kufizuar vetëm te pasagjerët. Sipas INSTAT, volumi i mallrave të transportuara me rrugë ajrore, përfshirë postën, arriti në 2.807 tonë gjatë vitit 2025, me rritje prej 24,4% krahasuar me vitin 2024./ekofin.al

