Shqipëria është përfshirë nga temperatura shumë të ulëta, të cilat sipas parashikimeve do të vijojnë gjatë gjithë javës.
Zëvendëskryeministrja Belinda Balluku ka publikuar në rrjetet sociale informacionin mbi situatën nga Autoriteti Rrugor Shqiptar.
Balluku bën apel për kujdes nga drejtuesit e mjeteve në këto ditë me temperatura nën 0 °C.
“Përdorni goma dimri në zonat ku ka borë dhe ngrica, respektoni sigurinë rrugore dhe ulni shpejtësinë”, shprehet ministrja.
Autoriteti Rrugor Shqiptar bën të ditur se akset rrugore janë të hapur për qarkullim por drejtuesit e mjeteve duhet të tregojnë kujdes të shtuar.
Në informacionin e ARRSH-së bëhet e ditur se, në Llogora termometri shënon -8°C, në Dibër -11°C, në Valbonë -12°C, në Korçë -7°C dhe në Dardhë -12°C.
