Administrata Tatimore paralajmëron të gjithë individët që po plotësojnë Deklaratën Individuale Vjetore të të Ardhurave (DIVA/DVAP) për vitin 2025: saktësia e të dhënave, veçanërisht sa i përket numrit të fëmijëve në ngarkim, është kusht thelbësor për përfitimin e rimbursimit.
Sipas njoftimit zyrtar, çdo deklarim i pasaktë do të monitorohet dhe verifikohet nga Administrata Tatimore, ndërsa mospërputhjet do të trajtohen në përputhje me legjislacionin në fuqi. Kjo nënkupton jo vetëm vonesë në procesin e rimbursimit, por edhe penalitete të panevojshme për deklaruesit.
Nga verifikimet paraprake të deklarimeve të kryera deri më tani për DIVA 2025, Tatimet njoftojnë se janë konstatuar disa raste me pasaktësi në lidhje me numrin e fëmijëve në ngarkim. Në një prej rasteve të evidentuara, një individ ka deklaruar plot 28 fëmijë në ngarkim, një shifër që ngre dyshime të forta për gabim apo deklarim të rremë.
Ky shembull tregon se sistemi i monitorimit tashmë po funksionon dhe se çdo deklarim i dyshimtë do të kalojë në filtrin e kontrollit administrativ.
Deklarimi i fëmijëve në ngarkim ndikon drejtpërdrejt në përllogaritjen e detyrimit tatimor vjetor dhe në masën e rimbursimit që mund të përfitojë individi. Çdo element që ndikon në uljen e bazës së tatueshme apo në kreditimin e tatimit kërkon dokumentacion të saktë dhe të verifikueshëm.
Nëse deklarimi rezulton i pasaktë, rimbursimi mund të pezullohet deri në përfundim të verifikimit; shuma e përfituar padrejtësisht do të rikuperohet; mund të aplikohen gjoba sipas parashikimeve ligjore.
Për këtë qëllim, Administrata Tatimore u bën thirrje të gjithë individëve që po dorëzojnë DIVA 2025 të kontrollojnë me kujdes të dhënat përpara konfirmimit përfundimtar, sidomos numrin e fëmijëve në ngarkim; përputhshmërinë me gjendjen civile; dokumentacionin mbështetës.
Në kushtet kur afati për dorëzimin e deklaratës po afrohet dhe kërkesat për rimbursim janë të larta, çdo pasaktësi jo vetëm që ngadalëson procesin individual, por rëndon edhe administratën me procedura shtesë verifikimi.

