Grupi i Bankës Botërore në prag të hartimit të strategjisë së re të Partneritetit me Shqipërinë, ka nisur konsultimet me përfaqësuesit e shoqërisë civile dhe aktorët e linjës, për reflektimin e rezultateve që janë arritur vitet e fundit përmes projekteve të financuara nga Banka.
Zyra e Bankës Botërore në Tiranë, bën të ditur se fokus i diskutimeve ishin çështjet se çfarë ka qenë e suksesshme e ҫfarë nuk ka shkuar shumë mirë, ҫfarë mësimesh kemi nxjerrë? Si mund të jemi edhe më efektive në ndihmën tonë ndaj vendit?
“Ndërsa shohim përpara, është e nevojshme të konsultohemi me grupet e interesit se cilat janë prioritetet dhe sfidat e ardhme për vendin? Si mund të ndihmojë Banka Botërore në përmbushjen e disa prej tyre e që lidhen me investimin tek kapitali njerëzor, rritjen e produktivitetit të kompanive, krijimin e një modeli cilësor të rritjes ekonomike, më të gjelbër, më të qëndrueshëm dhe gjithëpërfshirës, e që i përgjigjet sfidave të ndryshimeve klimatike, fatkeqësive natyrore, epokës digitale?”, thekson BB
Në këtë kuadër, ditët e fundit Zyra e Bankës Botërore në Tiranë ka zhvilluar takime konsultative virtuale me përfaqësues të sektorit privat, shoqërisë civile e botës akademike. Në këto takime u diskutua rreth fushave prioritare për zhvillimin ekonomik e social të vendit, modelit të rritjes, por dhe sfidave kryesore dhe rrugëve për tejkalimin e tyre.
