Dy kompanitë britanike të medias do të bashkohen nën të njëjtën çati, pasi ITV ka pranuar të shesë biznesin e saj të transmetimit televiziv dhe të transmetimit online (streaming) te Sky për 1.6 miliardë paund (rreth 1.87 miliardë euro). Marrëveshja synon të krijojë një konkurrent të fuqishëm përballë platformave globale të transmetimit.
Sky, kompania britanike që ofron shërbime televizive, interneti dhe telefonie celulare dhe që është në pronësi të Comcast, ka rënë dakord të blejë njësinë e medias dhe argëtimit të ITV-së për 1.6 miliardë paund (1.87 miliardë euro), pas muajsh negociatash, me synimin për të krijuar një rival të rëndësishëm ndaj gjigantëve ndërkombëtarë të transmetimit online.
Marrëveshja përfshin 1.2 miliardë paund (rreth 1.4 miliardë euro) në para të gatshme, transferimin e kompanisë Love Productions dhe deri në 200 milionë paund (233.8 milionë euro) në pagesa të lidhura me performancën, sipas deklaratës së kompanisë.
Në marrëveshje përfshihen kanalet televizive tokësore të ITV-së dhe platforma e saj e transmetimit online. Ndërkohë, krahu i prodhimit të programeve, ITV Studios, i njohur për emisione si “I’m a Celebrity”, do të mbetet një kompani e pavarur.
Kryetari i ITV-së, Andrew Cosslett, deklaroi se transaksioni do të “krijojë një kampion britanik me përmasa dhe burime të mjaftueshme për të konkurruar më mirë me platformat globale të transmetimit online.”
Sipas deklaratës, kompania e bashkuar do të kombinojë televizionin falas, transmetimin online të financuar nga reklamat dhe televizionin me abonim, së bashku me shërbimet e internetit, telefonisë celulare dhe biznesit të Sky, duke krijuar burime më të larmishme të të ardhurave.
ITV arrin çdo javë rreth 40 milionë shikues dhe ka më shumë se 16.5 milionë përdorues aktivë çdo muaj në platformat e saj dixhitale. “Së bashku me Sky, biznesi i ri do të përfaqësojë rreth 20% të gjithë shikueshmërisë brenda shtëpive në Mbretërinë e Bashkuar, duke u renditur i dyti pas BBC-së dhe përpara YouTube-it, si dhe do të krijojë një kampion komercial britanik në fushën e transmetimit online”, thuhet në deklaratë.
Kompania pret që bashkimi të gjenerojë rreth 200 milionë paund kursime vjetore deri në fund të vitit të tretë pas përfundimit të transaksionit, kryesisht falë efikasitetit më të madh në marketing, platformat teknologjike dhe përmbajtjen ndërkombëtare.
Sky ka rënë dakord gjithashtu të nënshkruajë një marrëveshje pesëvjeçare me vlerë 2.1 miliardë paund për furnizimin me përmbajtje nga ITV Studios, e cila do të hyjë në fuqi pas përfundimit të marrëveshjes.
Pas ndarjes së NBCUniversal nga Comcast, entiteti i bashkuar Sky-ITV do të bëhet pjesë e NBCUniversal, sipas ITV-së. Ndërkohë, ITV News dhe Sky News do të vazhdojnë të funksionojnë me redaksi të ndara dhe të pavarura.
Aksionet e ITV-së, të cilat tregtohen në Bursën e Londrës, u rritën me më shumë se 1% deri në orët e para të pasdites të së hënës./Përshtati nga Euronews, ekofin.al
