Shqipëria do të ketë parkun e saj të parë të prodhimit të energjisë elektrike nga era, me një kapacitet të instaluar prej 84 MW. Kompania gjermane Nordex Group ka njoftuar hyrjen për herë të parë në tregun shqiptar, pasi ka siguruar një kontratë nga kompania austriake e energjisë VERBUND për furnizimin dhe instalimin e 12 turbinave me erë në projektin e Spillesë.
Projekti përfaqëson një zhvillim të rëndësishëm për sektorin energjetik shqiptar, duke shënuar një hap konkret drejt diversifikimit të burimeve të prodhimit të energjisë elektrike dhe uljes së varësisë nga hidrocentralet.
Sipas njoftimit të Nordex Group, kontrata parashikon furnizimin dhe instalimin e 12 turbinave të modelit N163/6.X, të cilat do të sigurojnë një kapacitet të përgjithshëm prej 84 MW. Marrëveshja përfshin gjithashtu një kontratë 15-vjeçare për shërbimet e mirëmbajtjes dhe asistencës teknike, përmes programit Premium Service.
Parku eolik do të ndërtohet në zonën e Spillesë, rreth 50 kilometra në jug të qytetit portual të Durrësit. Turbinat do të vendosen mbi kulla çeliku, me një lartësi prej 113 metrash deri në qendrën e rotorit, duke mundësuar shfrytëzimin e potencialit të erës për prodhimin e energjisë elektrike.
Sipas planifikimit aktual, parku pritet të vihet në funksionim në pranverën e vitit 2028, duke shënuar hyrjen në prodhim të një kapaciteti të ri të energjisë së rinovueshme në Shqipëri.
Kompania austriake VERBUND është përzgjedhur për zhvillimin e projektit pas një tenderi ndërkombëtar, ndërsa bashkëpunimi me Nordex synon realizimin e investimit dhe garantimin e funksionimit afatgjatë të impiantit.
Drejtori Menaxhues i VERBUND Green Power, Dietmar Reiner, e cilësoi projektin si një moment historik për tranzicionin energjetik të Shqipërisë dhe një hap të rëndësishëm në strategjinë e zgjerimit të kompanisë.
“Projekti Spille, parku i parë eolik në Shqipëri, shënon një moment të rëndësishëm në tranzicionin energjetik të vendit dhe përfaqëson një hap përpara në strategjinë tonë të rritjes. Ekspertiza dhe angazhimi i Nordex na japin besim të plotë në këtë projekt, ndërsa partneriteti ynë afatgjatë mbështetet në vlera dhe një vizion të përbashkët për të ardhmen”, u shpreh Reiner.
Edhe drejtori ekzekutiv i Nordex Group, José Luis Blanco, theksoi rëndësinë e hyrjes së kompanisë në tregun shqiptar, duke e konsideruar projektin si një tregues të potencialit në rritje të energjisë së erës në vend.
“Hyrja në një treg të ri është gjithmonë një moment i rëndësishëm për ne dhe jemi shumë të kënaqur që po e ndërmarrim këtë hap në Shqipëri së bashku me VERBUND. Projekti Spille dëshmon mundësitë në rritje për energjinë e erës në vend. Me teknologjinë tonë N163/6.X dhe shërbimet afatgjata, synojmë të kontribuojmë në diversifikimin e mëtejshëm të burimeve të rinovueshme të energjisë në Shqipëri”, deklaroi Blanco.
Kontrata për parkun e Spillesë është pjesë e një bashkëpunimi më të gjerë ndërmjet Nordex dhe VERBUND Green Power. Në janar të vitit 2026, dy kompanitë nënshkruan një marrëveshje kuadër shumëvjeçare, e cila parashikon mundësinë e furnizimit me turbina eolike për projekte me kapacitet të përgjithshëm deri në 700 MW në gjashtë tregje evropiane, mes të cilave edhe Shqipëria.
Zhvillimi i parkut të Spillesë vjen në një periudhë kur Shqipëria po përpiqet të zgjerojë kapacitetet e prodhimit të energjisë nga burime të tjera të rinovueshme, përtej hidrocentraleve që historikisht kanë dominuar sistemin elektroenergjetik. /ekofin.al
