Nëpërmjet një botimi të publikuar në Fletoren Zyrtare është bërë me dije se Këshilli i Ministrave ka miratuar shpërblimin për disa kategori të veçanta për festat e fundvitit.
Përfituesit nga skema e ndihmës ekonomike dhe aftësisë së kufizuar do të shpërblehen financiarisht, për vitin 2021, në masën 3 000 (tre mijë) lekë, të ndarë sipas kategorive të mëposhtme:
a) familjet dhe individët përfitues të ndihmës ekonomike, të përcaktuar në nenin 7, të ligjit nr. 57/2019, “Për asistencën sociale në Republikën e Shqipërisë”;
b) individët përfitues të pagesës së aftësisë së kufizuar, të përcaktuar në shkronjat “b” dhe “c”, të nenit 8, të ligjit nr. 57/2019, “Për asistencën sociale në Republikën e Shqipërisë”;
c) individët përfitues të statusit, sipas ligjit nr. 8626, datë 22.6.2000, “Statusi i invalidit paraplegjik dhe tetraplegjik”, të ndryshuar;
ç) individët përfitues të statusit, sipas ligjit nr. 8098, datë 28.3.1996, “Për statusin e të verbrit”, të ndryshuar.
Efektet financiare, që rrjedhin nga zbatimi i këtij vendimi, që llogariten në shumën 413 658 000 (katërqind e trembëdhjetë milionë e gjashtëqind e pesëdhjetë e tetë mijë) lekë, përballohen nga fondi rezervë i buxhetit të shtetit për vitin 2021.
Ngarkohen Ministria e Shëndetësisë dhe Mbrojtjes Sociale dhe Ministria e Financave dhe Ekonomisë për zbatimin e këtij vendimi. Ky vendim hyn në fuqi menjëherë dhe botohet në Fletoren Zyrtare.
