Prodhuesi rus i naftës Lukoil ka deklaruar se synon të shesë asetet e tij ndërkombëtare për shkak të sanksioneve të SHBA-së dhe se tashmë ka filluar të shqyrtojë ofertat. Degët e huaja të kompanisë përfshijnë rafineri nafte në Bullgari dhe Rumani, si edhe rrjete të shitjes me pakicë të karburanteve në mbarë Evropën Juglindore.
Shitja e aseteve ndërkombëtare të Lukoil po kryhet nën një licencë të pezullimit (wind-down license) të lëshuar nga Zyra Amerikane e Kontrollit të Aseteve të Huaja (OFAC). Në një deklaratë për shtyp, kompania tha se mund të kërkojë zgjatjen e afatit të licencës, nëse kjo do të jetë e nevojshme për të siguruar funksionimin pa ndërprerje të filialeve të saj.
Objektet që po dalin në shitje përfshijnë rafinërinë më të madhe të Ballkanit, Lukoil Neftohim Burgas në Bullgari, si dhe rafinërinë Petrotel-Lukoil në Rumani. Lukoil zotëron gjithashtu rrjete karburantesh në Rumani, Bullgari, Turqi, Maqedoninë e Veriut, Kroaci, Serbi dhe Mal të Zi.
Lukoil Neftohim Burgas është një aktor kryesor në tregun bullgar, duke furnizuar pothuajse të gjithë tregun kombëtar, sipas raporteve. Kapaciteti i saj arrin në 190,000 fuçi në ditë. Ndërkohë, Petrotel-Lukoil në Rumani ka një kapacitet shumë më të vogël, rreth 2.4 milionë tonë në vit.
Parlamenti bullgar ka miratuar ndryshime ligjore që kërkojnë që çdo shitje e aseteve të Lukoil në Bullgari të miratohet paraprakisht nga qeveria dhe shërbimet e inteligjencës së vendit.
Sanksionet e SHBA-së ndaj kompanive energjetike ruse, të cilat hynë në fuqi në fillim të këtij muaji, po ndikojnë gjithashtu mbi NIS, një kompani përpunimi dhe tregtimi karburantesh me bazë në Serbi, në pronësi të Gazprom-it rus.
Në të njëjtën kohë, Bashkimi Evropian planifikon të ndalojë importet e gazit natyror rus duke filluar më 1 janar 2026. Megjithatë, një zëdhënës i Komisionit Evropian theksoi se ndalimi nuk do të zbatohet për tranzitin e gazit rus dhe nuk do të ndikojë në furnizimet për Serbinë dhe Bosnjë-Hercegovinën./Përshtati nga Balkan Green News Energy, ekofin.al
