Nga janari i vitit 2022 dhe në vazhdim për pesë vite me radhë, cigaret do të kushtojnë edhe më shumë.
Në propozimet e bëra në ndryshimet e paketës fiskale, qeveria parashikon shtesë të ndjeshme me rreth 20 për qind të akcizës për to.
Sipas tabelës së Drejtorisë së Doganave aktualisht vlera është 5500 lekë për 1 mijë copë cigare, por që propozohet të shkojë në 6750 në vitin e ardhshëm dhe duke shënuar rritje nga viti në vit duke përfunduar në 7750 lekë në vitin 2027.
E njëjta rritje është edhe për duhanin e përpunuar por edhe për cigaret elektronike të përfshira në skemën e re të qeverisë.
Sa i përket purove, shtesa në akcizë është edhe më shumë e lartë me një shtesë 2 deri në 3 herë më shumë.
Për herë të parë qeveria parashikon të fusë në akcizë dhe nikotinën lëng me një vlerë 12 lekë për mililitër dhe duke vijuar deri në 20 lekë në 2027.
Shisha nargjile do të shtrenjtohet po ashtu. Qeveria parashikon për këtë kategori një akcizë që nis me 6750 lekë për kilogram dhe duke u rritur vit pas viti deri në 8750 lekë për kilogram deri pas 5 vitesh.
Sipas relacionit të qeverisë në buxhetin e shtetit parashikohet të ketë të ardhura shtesë në vlerën e 750 milionë lekëve.
