Shqipëria po forcon gjithnjë e më shumë pozicionin e saj si një nga destinacionet turistike më dinamike në Europë. Sipas të dhënave të publikuara nga ministri i Turizmit, Kulturës dhe Sportit, Blendi Gonxhja, gjatë muajit maj 2026 vendi mirëpriti 1,143,595 vizitorë të huaj, duke shënuar një rritje prej 16% krahasuar me të njëjtin muaj të vitit 2025.
Shifrat konfirmojnë trendin pozitiv të turizmit shqiptar, i cili po mbështetet nga investimet në infrastrukturë, zgjerimi i kapaciteteve akomoduese, promovimi i vazhdueshhëm i vendit në tregjet ndërkombëtare dhe pasurimi i ofertës turistike gjatë gjithë vitit.
Kontributin më të madh në numrin total të vizitorëve vijojnë ta japin turistët nga Kosova me 321,714 vizitorë dhe nga Italia me 120,344 vizitorë. Ndërkohë, një interes në rritje po vërehet edhe nga tregje me potencial të lartë si Shtetet e Bashkuara të Amerikës, Kanadaja dhe Mbretëria e Bashkuar, duke dëshmuar se Shqipëria po tërheq gjithnjë e më shumë turistë që kërkojnë natyrë të paprekur, trashëgimi kulturore, gastronomi autentike dhe mikpritje tradicionale.
Sa i përket ritmeve të rritjes, surpriza e këtij sezoni vjen nga Lituania, e cila kryeson listën me një rritje mbresëlënëse prej 273% të vizitorëve krahasuar me majin e vitit të kaluar. Pas saj renditen Danimarka me 253%, Finlanda me 83% dhe Polonia me 80%.
Rritje të konsiderueshme kanë shënuar gjithashtu vizitorët nga Irlanda (+63%), Izraeli (+48%), SHBA (+37%), Kanadaja (+37%), Mbretëria e Bashkuar (+32%), Suedia (+26%), Republika Çeke (+25%), Belgjika (+24%), Italia (+24%), Franca (+21%), Portugalia (+19%) dhe Kosova (+15%).
Me mbi 1.1 milion vizitorë vetëm në muajin maj, Shqipëria po hyn në sezonin veror me ritme rekord, duke sinjalizuar një tjetër sezon pozitiv.
