Turistët e huaj kanë dominuar rritjen e akomodimeve në Shqipëri gjatë muajit mars 2026, duke konfirmuar vijimin e zgjerimit të turizmit ndërkombëtar në vend edhe jashtë sezonit veror. Të dhënat e publikuara nga INSTAT tregojnë se numri i vizitorëve jo-rezidentë të akomoduar në strukturat turistike u rrit me 23.7% krahasuar me marsin e vitit të kaluar, ndërsa vizitorët rezidentë shënuan një rritje më të moderuar prej 15.9%.
Në total, numri i vizitorëve të akomoduar në strukturat turistike në Shqipëri u rrit me 20.8% në mars 2026 në raport me të njëjtin muaj të një viti më parë, duke reflektuar një zgjerim të kërkesës turistike dhe shtim të flukseve hyrëse nga tregjet e huaja.
Sipas INSTAT, Italia vijon të mbetet tregu kryesor për turizmin hyrës në Shqipëri, me 30% të totalit të vizitorëve të huaj që u akomoduan gjatë muajit mars. Pas saj renditet Kosova me 12%, Gjermania me 7%, ndërsa Mbretëria e Bashkuar dhe Franca përfaqësojnë përkatësisht 6% dhe 5% të totalit të turistëve të huaj. Pjesa tjetër prej 40% përbëhet nga vizitorë nga vende të tjera.
Rritja më e fortë e turistëve jo-rezidentë është regjistruar në Rajonin e Veriut, ku numri i tyre arriti në 30,986 vizitorë në mars 2026, nga 13,516 që ishte një vit më parë, duke reflektuar më shumë se dyfishim të flukseve turistike në këtë zonë. Ndërkohë, rajoni qendror mbetet ai me numrin më të lartë absolut të turistëve të huaj, me 61,873 vizitorë gjatë muajit mars.
Të dhënat tregojnë gjithashtu se zonat bregdetare po tërheqin gjithnjë e më shumë turistë të huaj edhe jashtë sezonit tradicional veror. Numri i jo-rezidentëve të akomoduar në zonat bregdetare arriti në 45,946 në mars 2026, nga 31,691 një vit më parë.
Paralelisht me rritjen e vizitorëve, është zgjeruar edhe kohëzgjatja e qëndrimit. Net-qëndrimet e turistëve jo-rezidentë u rritën me 14.4% krahasuar me marsin 2025, ndërsa net-qëndrimet totale shënuan një rritje prej 12.8%.
Edhe treguesit e shfrytëzimit të kapaciteteve hoteliere kanë vijuar përmirësimin. Norma e shfrytëzimit të dhomave në hotele arriti në 18.5% në mars 2026, nga 18.1% që ishte në të njëjtën periudhë të vitit të kaluar. /ekofin.al
