Shoqata e mikrofinancës i vlerëson rregullat e reja nga banka e Shqipërisë me impakt në frenimin e kreditimit të popullatës. Sipas tyre, rregullatori po ndërhyn në treg për të mbrojtur konsumatorin, por problem i vërtetë janë kompanitë borxh mbledhës dhe jo ato të mikrofinancës. Duke analizuar në studion e emisionit E-ZONE Brunilda Isaj, sekretare e shoqatës na tregon mbi impaktin që do të ketë në treg.
“Ne kemi 200 mijë klientë. Nga kjo shifër 120-130 mijë janë individë që marrin kredi konsumatore, pjesa tjetër janë biznese apo agro. Nga ky kontingjent 30% e tyre janë individë që janë në limite të të ardhurave të tyre, pra që mund të kenë vështirësi në pagesa. Ajo që ne mendojmë është që e sigurt që një përqindje e këtyre individëve nuk do të kenë akses në financim”, tha Isaj në Vizion Plus.
Paralelisht me këtë fakt, kompanitë e mikrofinancës presin të shohin në praktikë se cili do të jetë impakti i vërtetë i këtyre masave, pasi për momentin nuk ka një analizë të tillë. Por kompanitë kërkojnë edhe një formalizim të tregut të pagave.
“Ne duam që masa të tilla të ecin paralelisht edhe me formalizmin e tregut të pagave. Nga një anketim që kemi bërë na rezulton se 50% e klientëve nuk i kanë të ardhurat të formalizuara në mënyrë të plotë. Ky është një efekt që ka ndikim në miratimin e kredimarrësit. Ne do të kërkojmë që të na jepet akses për të verifikuar të ardhurat e plota të individit, sigurisht duke marrë dhe pëlqimin e tij”, u shpreh më tej Isaj.
Kompanitë e mikrokredive e vlerësojnë si një sjellje agresive kriteret e reja të përcaktuara nga banka qendrore, ndërsa thonë se po penalizohen nga fenomeni i kompanive borxh mbledhëse nga i cili shoqata distancohet./VIZION PLUS
