Aksi rrugor Thumanë-Kashar do të ndërtohet me koncesion, ndërsa punimet në të gjitha lotet e tij parashikohet të mbyllen brenda 36 muajve.
Ministrja e Infrastrukturës dhe Energjisë, Belinda Balluku deklaroi sot se qeveria ka miratuar në mbledhjen e sotme të Këshillit të Ministrave kontratën për projektimin, ndërtimin, mirëmbajtjen, operimin dhe transferimin e aksit.
“Kontrata e lidhur më herët në bazë të instrumentit PPP u anullua, pasi fondet u vunë në dispozicion të “Paktit për Universitetet”. I jemi kthyer kësaj kontrate. Shteti nuk do të investojë për ndërtimin e këtij aksi. Ky aks do të ndërtohet mbi parimin e koncesionit dhe kompania do ta transferojë pas 35 vitesh në pronësi të shtetit shqiptar”, deklaroi ministrja Balluku.
Balluku u shpreh se aksi Thumanë-Kashar është një ndër më të rëndësishmit e Korridorit Blu dhe një ndër më të rëndësishmit të ndërlidhjes në Ballkanin Perëndimor.
“Ne synojmë të hapim të gjithë lotet brenda vitit 2020 për ti pasur të përfunduar në 36 muajt e ardhshëm”, deklaroi Balluku.
