Një ministre e re në Shqipëri, e ngarkuar për të menaxhuar prokurimet publike, do të jetë e paprekshme ndaj ryshfeteve, kërcënimeve apo përpjekjeve për favore. Kjo sepse Diella, siç quhet ajo, është një bot i gjeneruar nga inteligjenca artificiale.
Kryeministri Edi Rama, i cili është gati të nisë mandatin e tij të katërt, deklaroi të enjten se Diella – që në shqip do të thotë “diell” – do të menaxhojë dhe do të japë të gjitha tenderat publikë ku qeveria kontrakton kompani private për projekte të ndryshme.
“Diella është anëtarja e parë e kabinetit që nuk është fizikisht e pranishme, por është krijuar virtualisht nga AI,” tha Rama gjatë një fjalimi për prezantimin e kabinetit të ri. Sipas tij, ajo do të ndihmojë që Shqipëria të bëhet “një vend ku tenderat publikë janë 100% të lirë nga korrupsioni.”
Dhënia e kontratave të tilla ka qenë prej kohësh burim skandalesh korrupsioni në Shqipëri, një vend ballkanik që sipas ekspertëve është qendër e grupeve kriminale që kërkojnë të pastrojnë paratë nga trafiku i drogës dhe armëve në mbarë botën, dhe ku korrupsioni ka depërtuar deri në nivelet më të larta të pushtetit.
Kjo imazh i ka ndërlikuar përpjekjet e Shqipërisë për t’u anëtarësuar në Bashkimin Evropian – një objektiv që Rama synon ta arrijë deri në vitin 2030, por që analistët politikë e konsiderojnë ambicioz.
Qeveria nuk dha detaje për mbikëqyrjen njerëzore që mund të ketë mbi Diellën dhe as nuk adresoi rreziqet që dikush mund të manipulojë bot-in e inteligjencës artificiale.
Diella u prezantua fillimisht në fillim të këtij viti si një asistente virtuale me AI në platformën e-Albania, duke ndihmuar qytetarët dhe bizneset të marrin dokumente shtetërore. E veshur me kostum tradicional shqiptar, ajo ofron ndihmë përmes komandave zanore dhe lëshon dokumente me vulë elektronike, duke reduktuar vonesat burokratike.
Megjithatë, jo të gjithë janë të bindur. Një përdorues në Facebook tha: “Edhe Diella do të korruptohet në Shqipëri.” Një tjetër shtoi: “Vjedhja do të vazhdojë dhe do të fajësohet Diella.”
Parlamenti i ri, i zgjedhur në maj, pritet të mblidhet të premten, ndonëse mbetet e paqartë nëse qeveria do të votohet po atë ditë./Përshtati nga Reuters, ekofin.al
