Rënia e fortë e normave të interesit të bonove të thesarit, veçanërisht gjatë muajit janar, ka shkaktuar edhe një zhvendosje masive të parave nga letrat me vlerë të qeverisë drejt depozitave bankare. Për muajt dhjetor 2022-janar 2023, totali i depozitave në sistemin bankar është shtuar me më shumë se 14 miliardë lekë.
Një masë e madhe e këtyre luhatjeve të depozitave vlerësohet se ka të bëjë me atë që ka ndodhur me bonot e thesarit, të cilat në ankandet e fundit kanë pësuar rënie të fortë, pas kërcimit të normave vitin e kaluar.
Nga të dhënat zyrtare të Bankës së Shqipërisë për muajin janar, raportohen interesa deri në 3.5% për depozitat dyvjeçare. Po ashtu, të paktën 4 banka të nivelit të dytë propozojnë interesa mbi 3.5% për depozita me afat mbi 60 muaj. Për depozitat me afat 1-vjeçar gjenden në treg oferta deri 3%. Kjo tendencë ka shtyrë veçanërisht individët të transferojnë kursimet drejt depozitave me afat, duke zhvleftësuar edhe më tej përfitimet nga bonot e thesarit të Qeverisë.
