Kryeministri Edi Rama ishte këtë të hënë në prezantimin e projektit për parkun eolik të Tropojës.
Rama tha se projekti është tepër i rëndësishëm edhe për prioritetin kryesor të Shqipërisë, integrimin në Bashkimin Europian. Kreu i qeverisë shtoi se projekti do të jetë realitet për 12 muaj. Rama nënvizoi se vendi ynë synon që të bëhet një shtet me pavarësi energjitike.
“Më vjen shumë mirë që finalizojmë një përpjekje rreth 2-vjeçare, me kompaninë e mirënjohur amerikane, për gjithë procesin parapërgatitur, që shtë më i shkurtër se procesi i ndërtimit. Ne shpresojmë që gjithçka të shkojë siç duhet dhe për 12 muaj, ky park i madh i energjisë së erës në Tropojë të hyjë në rrjetin e prodhuesve të energjisë të rinovueshme në vendin tonë. Unë kam shumë besim se do përfitojmë edhe besim e vlerë të shtuar në kulturën e punës dhe veprimit, në një sektor strategjik si sektori energjitik. Investimi ndihmon në objektivin tonë strategjik, integrimin në BE.
Nuk ka një kompani të vetme serioze, që ka marrë pjesë në garë për të marrë përsipër projektin, lidhur me integritetin e garës. Kompania na ka bërë përshtypje të veçantë në sensin e përgjegjësisë sociale, në ndjeshmërinë e saj ndaj mjedisit. Sot Shqipëria është në një nivel krejt tjetër. Sot është një Shqipëri krejt tjetër. Nuk e besoj se ndokush do e imagjinonte se Shqipëria do bashkëpunonte me vende tepër të zhvilluara në projekte kaq madhore. Ne prodhojmë energji më shumë nga se ka nevojë tregu i brendshëm”., tha Rama.
Rama tha se “ky është një zhvillim i rëndësishëm për të përmbushur synimin që Shqipëria të jetë vend sovran në prodhimin e energjisë”.
“Koha kur Shqipëria duhet të dali në treg për të blerë energji po shkon drejt fundit dhe ne do të jemi në kategorinë e jo shumë vendeve që gëzojnë pavarësi të plotë kur vjen puna te prodhimi i kësaj lënde vitale për organizmin e një shteti.
Kjo për rezultat i investimeve, i një vizioni, i një programi i dhe i një përpjekjeje të përditshme nga ministra e Energjisë. Uji do të mbetet burimi kryesor i prodhimit, por energjia e diellit dhe erës kanë filluar të zënë vendin e tyre, vend që deri në fund të kësaj dekade, do të jetë 30%”, tha Rama.
Me këtë 30% theksoi kryeministri Edi Rama, do të kemi plotësisht të garantuar që sistemi ynë do të jetë i vetëmjaftueshëm dhe do të prodhojmë përtej nevojave duke mundësuar eksportin.
