Qeveria ka miratuar rregullat dhe kriteret për administrimin e fondit të veçantë të buxhetit të policisë së shtetit.
Sipas vendimit, Drejtori i Përgjithshëm i Policisë së Shtetit ndan fondin e veçantë, i cili është në maksimum sa 1% e buxhetit vjetor të Policisë së Shtetit, sipas nevojave që kanë strukturat qendrore dhe vendore të Policisë së Shtetit.
Pagesat jepen pas realizimit të veprimit policor konkret dhe marrjes së rezultatit ose në bazë të një planifikimi paraprak për realizimin e aktiviteteve policore ku parashikohen shpenzime operacionale.
Ndalohet dhënia e shpërblimeve më shumë se një herë, të njëjtit burim, për të njëjtin rezultat konkret.
Rregullat dhe kriteret e administrimit të fondit të veçantë, përfshijnë detyrat dhe përgjegjësitë e autoriteteve, ku:
- Shefi i Komisariatit të Policisë autorizon përdorimin deri në 100 000 (njëqind mijë) lekë ose vlerën ekuivalente në valutë.
- Zëvendësdrejtori për Hetimin e Krimeve/për Sigurinë Publike, në Drejtorinë Vendore të Policisë, autorizon përdorimin deri në 200 000 (dyqind mijë) lekë ose vlerën ekuivalente në valutë.
- Drejtori i strukturës vendore të policisë/drejtuesi i sektorit për hetimin e krimeve në drejtorinë qendrore dhe drejtuesi i sektorit dhe zëvendësdrejtor në Drejtorinë e Antiterrorit autorizojnë përdorimin deri në 500 000 (pesëqind mijë) lekë ose vlerën ekuivalente në valutë.
- Drejtori i Strukturës Qendrore për Hetimin e Krimeve, në Drejtorinë e Përgjithshme të Policisë së Shtetit, autorizon përdorimin deri në 1 000 000 (një milion) lekë ose vlerën ekuivalente në valutë.
- Drejtori i Departamentit të Policisë Kriminale, drejtori i Departamentit për Sigurinë Publike dhe drejtori i Drejtorisë së Antiterrorit autorizojnë përdorimin e deri në 5 000 000 (pesë milionë) lekë ose vlerën ekuivalente në valutë.
- Drejtori i Përgjithshëm i Policisë së Shtetit autorizon përdorimin e mbi 5 000 000 (pesë milionë) lekë ose vlerën ekuivalente në valutë.
- Nuk mund të autorizohet përdorimi i fondit të veçantë përtej fondit limit të përcaktuar në buxhetin për strukturën policore përkatëse. Në rastet kur nevojat janë përtej fondit limit të përcaktuar, kërkohet miratim nga eprori që ka kompetencë dhënien e autorizimit të përdorimit ose shtesë buxheti në fondin e veçantë.
- Në rastet kur strukturë autorizuese sipas këtij neni nuk është drejtuesi i njësisë shpenzuese, në çdo rast kërkohet miratimi i këtij të fundit.
- Kur gjatë përdorimit të fondit të veçantë, dinamika kërkon fonde të tjera, përtej atyre të miratuara, autorizohen fonde shtesë, me kusht që shuma e të gjitha rasteve të miratuara për përdorim të fondit të veçantë të mos kapërcejë kompetencën e autoritetit policor që jep autorizimin e përdorimit.
Gjithashtu është përcaktuar edhe procedura e planifikimit të fondit të veçantë të Policisë së Shtetit. Struktura të ndryshme policore dorëzojnë kërkesat për fondin e vitit pasardhës brenda tremujorit të parë të vitit. Sektori i arkivit kriminal përgatit parashikimin tremujor dhe ia dërgon Drejtorisë së Financave për përfshirje në projektbuxhet. Pas miratimit, Drejtoria e Financave shpërndan planin e përdorimit të fondit.
Gjithashtu, parashikohet një fond rezervë prej 10 milionë lekësh, i mbajtur në dispozicion në sektorin e financave. Në raste emergjente kriminale ose operacione të paplanifikuara, Drejtori i Përgjithshëm mund t’i propozojë Ministrit të Brendshëm një buxhet shtesë, pa tejkaluar 1% të buxhetit vjetor të Policisë së Shtetit.
Punonjësi i policisë, nga koha që ka tërhequr paratë në strukturat e financës, duhet të mbyllë praktikën në këto afate: brenda 20 (njëzet) ditëve në rastet e dhënies së shpërblimeve; brenda 3 (tre) muajve, në rastet e përdorimit të fondit të veçantë për shpenzime gjatë kryerjes së operacioneve të veçanta policore.
Në rastet e mosmbylljes së veprimeve me financën dhe arkivin kriminal brenda afatit tremujor, për shkak të shtrirjes në kohë të operacionit të veçantë policor, përtej këtij afati, vonesa motivohet në relacionin shpjegues dhe në dëftesen përfundimtare. Në çdo rast, veprimet duhet të mbyllen brenda një muaji nga përfundimi i operacionit të veçantë policor.
E gjithë praktika dokumentare klasifikohet si “Tepër sekret”, në përputhje me ligjin për informacionin e klasifikuar dhe ruhet në arkivin kriminal të strukturave policore. Evidentimi bëhet sipas një regjistri të posaçëm dhe ndarja është sipas viteve.
Në rast se fondet nuk përdoren apo refuzohen nga burimet, ato kthehen menjëherë në financë, me dokumentacion shoqërues dhe arsyetim zyrtar. Vendimi do të hyjë në fuqi pas botimit në Fletoren Zyrtare/ekofin.al
