Pronësia industriale dhe mbrojtja e markave dhe patentave nga bizneset shqiptare, edhe pse me një rritje të lehtë, është ende në fillesat e saj.
Përgjatë vitit 2024 janë paraqitur për regjistrim marke 1575 aplikime pranë Drejtorisë së Përgjithshme të Pronësisë Industriale, kurse gjatë vitit 2023 janë paraqitur për regjistrim marke në total 1311 aplikime.
Vihet re një rritje e numrit të aplikimeve për regjistrim marke, por përsëri ky numër është ende i vogël si dëshmi që bizneset shqiptare nuk jane ende mjaftueshëm të ndërgjegjësuara për mbrojtjen e markës.
Shqipëria ka aderuar në Marrëveshjen e Madridit më 1 shtator 1993 dhe më pas ka aderuar gjithashtu në Protokollin e Madridit më 25 mars 2008. Kjo do të thotë që aplikantët shqiptarë mund të përfitojnë nga mundësitë e ofruara nga të dyja sistemet për regjistrimin e markave ndërkombëtare, si dhe mund të kërkojnë mbrojtje në shtetet që janë pjesë e këtyre marrëveshjeve.
Gjatë vitit 2024 për shtrirjen e mbrojtjes për Republikën e Shqipërisë ishin në total 2677 aplikime ndërkombëtare, ndërsa për vitin 2023 ishin 2954 aplikime, për regjistrim marke nga Marrëveshja e Madridit.
Ajo që vihet re nga grafikët e mësipërm është trendi në rritje për regjistrimet ndërkombëtare të cilat kërkojnë të shtrijnë mbrojtjen edhe në territorin e Shqipërisë.
Ndërkohë, bizneset shqiptare janë ende në fillesat e ndërgjegjësimit për mbrojtjen e markave.
Të dhënat e DPPI-së për regjistrimin e markave kombëtare tregojnë se përgjatë vitit 2024 janë lëshuar 1020 certifikata regjistrimi, në vitin 2023 janë lëshuar 1087 certifikata.
Patentat për shpikje
E njëjta dukuri vihet re edhe për patentat ku mbrojtja ndërkombëtare tejkalon shumëfish atë kombëtare.
Sipas raportit, gjatë vitit 2024, Sektori i Patentave dhe i Modeleve të Përdorimit ka pasur 742 aplikime për patenta, nga të cilat 12 janë aplikim për patentë kombëtare me aplikantë shtetas shqiptarë dhe 730 aplikime për patenta janë patenta të lëshuara nga Zyra Europiane e Patentave, të cilat kërkojnë mbrojtje në Shqipëri.
Aplikimet kombëtare janë kryesisht 2 patenta në fushën mekanike; 2 patenta në fushën e teknologjisë ushqimore dhe 8 patenta janë të fushës së artikujve personalë/ shtëpiakë (nevoja njerëzore). /ekofin.al
