Agjencia Kombëtare e Shoqërisë së Informacionit (AKSHI) ka shpallur procedurën e prokurimit me vlerë 2 miliardë lekë për modernizimin e sistemit të prokurimeve publike (GOVTECH/2).
Sistemi elektronik i inteligjencës parashikohet në Strategjinë Kombëtare për Prokurimin Publik 2024-2030. Në dokument argumentohet se përdorimi i këtij sistemi bëhet në kuadër të rritjes së transparencës dhe eficiencës dhe do t’u shërbejë disa proceve të prokurimit publik, sikurse janë: përllogaritja e vlerës limit të kontratës dhe studimi i tregut.
Gjithashtu, sipas dokumentit hartimi i specifikimeve teknike duhet të kryhen në sisteme elektronike të çertifikuara, mbështetur në ndërveprim me sisteme të tjera të Platformës Qeveritare të Ndërveprimit. Për këtë qëllim, Sistemi i Prokurimit Elektronik do të zhvillohet duke përdorur teknologji të avancuar të Inteligjencës Artificiale dhe procese të robotizuara në përputhje me parashikimet evropiane.
Po kështu, inteligjenca artificiale dhe proceset e robotizuara do t’i shërbenin më mirë transparencës veçanërisht në kualifikimin e ofertuesve në fazën e parë të parakualifikimit si dhe ankandit elektronik dhe po ashtu edhe do të përmirësonte systemin e ankesave elektronike dhe automatizimi i proceseve.
Në mënyrë të vazhdueshme procedurat e tenderave janë ato që kanë çuar më shumë zyrtarë të lartë në dyert e SPAK. Në fakt, manovrat që bëhen me fryrjen e fondit limit ose me realizimin e tenderave me vetëm një ofertues, ose shpalljen fituese të ofertave me vlerën më të lartë janë disa nga mënyrat e abuzimeve me tenderat, që i kanë shkaktuar dëme të konsiderueshme buxhetit të shtetit. Qeveria synon që të luftojë korrupsionin në tendera përmes përdorimit të inteligjencës artificiale./ekofin.al
