Transformimi, zhvillimi, apo siç quhet “rijetëzimi” i stadiumit “Niko Dovana” në Durrës, do të realizohet bazuar në projektin e studios belge “51N4E + Plan Comun”, që u shpall fituese në një konkurs të zhvilluar në vitin 2023. Në atë rast, Qeveria ngarkoi Fondin Shqiptar të Zhvillimit për zbatimin e idesë arkitekturore të studios për të transformuar stadiumin, por me shumë mundësi për mungesë fondesh projekti nuk mundi të zbatohej.
Ekofin.al sjell gjithashtu maketet e projektit të studios belge, që tashmë do të duhet të implementohen nga ato subjekte private që do të shpallen fituese për zhvillimin e pronës.
Tashmë, pas vendimit të Këshillit të Ministrave për t’ia trasnferuar pronat publike Korporatës së Investimeve Shqiptare, kjo e fundi hapi thirrjen për rijetëzimin e stadiumit “Niko Dovana” Durrës, ndërtimin e Qendrës Sportive/Komunitare, si dhe rikualifikimin e zonës përreth.
Projekti i investimit synon të transformojë pronat shtetërore që shfaqin aktualisht shenja amortizimi, degradimi dhe infrastrukturë të vjetëruar. Projekti realizohet nëpërmjet një modeli partneriteti, ku Korporata ka rolin e zhvilluesit dhe ndërmjetësuesit midis institucionit publik që ka interes të zhvillojë pronat e tij dhe të përfitojë prona të përmirësuara dhe partnerit privat, që posedon burimet financiare, njerëzore dhe kapacitetet ekzekutive dhe ka interes në realizimin e projektit të investimit.
Korporata ka hapur thirrjen publike me synimin të përzgjedhë partnerin privat, në cilësinë e Sipërmarrësit për zhvillimin e pronës për sipërmarrje, duke realizuar projekt-idenë arkitekturore të bashkimit të subjekteve “51N4E + Plan Comun”, thuhet më tej në njoftim, i cili sqaron më tej edhe procedurën që do të ndiqet për vlerësimin dhe shpalljen e fituesit. Thirrja për oferta do të jetë e hapur deri në 15 shtator.
“Pronat e dedikuara për këtë projekt arrijnë një sipërfaqe totale prej mbi 76 mijë m2, ku përfshihen terrene sportive me sipërfaqe 34,879.27 m2, sheshe 23,700.98 m2, truall 8,128.26 m2, rrugë 4,330.03 m2 dhe trotuare 5,123.21 m2” thuhet në dokumentet e njoftimit nga Korporata.
Në projektin e studios belge, arkitektët kanë përcaktuar dhe planin e zhvillimit që përbëhet nga 5 zona.
1. Zona e parë e zhvillimit do të jetë objekti i stadiumit me një sipërfaqe prej 27,037.2 m2. Këtu përfshihet rindërtimi dhe transformimi i stadiumit “Niko Dovana”, Durrës në një arenë moderne me kapacitet të përmirësuar, përveç ndërtimit të tribunave të reja dhe ambienteve të dedikuara për sportistët, mediat dhe publikun, projekti parashikon krijimin e një infrastrukture mbështetëse që përmirëson përvojën e përdoruesve (zhvillim publik).
2. Zona e dytë do të jetë një zonë multifunksionale në të cilën do të ketë një qendër konferencash, zyra, një bibliotekë, një qendër kulturore dhe sportive dhe ambiente të tjera multifunksionale me një sipërfaqe prej 32,715 m2 (zhvillim publik dhe multifunksional).
3. Zona e tretë e zhvilluar do të jetë një zonë multifunksionale e fokusuar në ambiente zyrash dhe prodhimi, hapësira tregtare dhe argëtimi 28,598 m2 (zhvillim multifunksional)
4. Zona e katërt e zhvilluar do të fokusohet në banim dhe ambiente tregtare 18,597m2 (zhvillim multifunksional)
5. Zona e pestë ndërtesa e fundit është hoteli i farit, një godinë “llambe” e vendosur në sheshin e ri dhe aksesi kryesor është nga Jugu 11,562 m2 (zhvillim hospitality). /ekofin.al
