Është botuar në Fletore Zyrtare Programi i Reformave Ekonomike (ERP) 2026–2028, dokumenti strategjik që shërben si bazë e dialogut ekonomik me Bashkimin Europian dhe institucionet financiare ndërkombëtare, duke përcaktuar drejtimet kryesore të politikave makroekonomike, fiskale dhe strukturore për tre vitet e ardhshme.
ERP 2026–2028 synon të garantojë rritje ekonomike të qëndrueshme, konsolidim fiskal gradual dhe përmirësim të konkurrueshmërisë së ekonomisë, në një kontekst të shënuar nga pasiguritë globale, presionet inflacioniste dhe nevoja për përafrim më të shpejtë me standardet e BE-së.
Rritja ekonomike dhe skenari makroekonomik
Sipas dokumentit, kuadri makroekonomik parashikon vijimin e rritjes ekonomike në afatmesëm, të mbështetur nga konsumi i brendshëm, investimet publike dhe private, si dhe nga përmirësimi gradual i eksporteve. Programi merr në konsideratë edhe skenarë alternativë rreziku, të lidhur me zhvillimet gjeopolitike, kushtet financiare ndërkombëtare dhe ecurinë e ekonomive partnere, duke theksuar nevojën për politika fleksibël dhe masa parandaluese.
Një element kyç mbetet stabiliteti makroekonomik, me fokus në kontrollin e inflacionit dhe ruajtjen e ekuilibrave financiarë, në bashkëpunim të ngushtë me Bankën e Shqipërisë.
Konsolidimi fiskal dhe menaxhimi i financave publike
Në qendër të ERP 2026–2028 është edhe konsolidimi fiskal. Qeveria parashikon vijimin e uljes graduale të deficitit buxhetor dhe forcimin e qëndrueshmërisë së financave publike, përmes rritjes së eficiencës së shpenzimeve dhe përmirësimit të mbledhjes së të ardhurave.
Programi nënvizon rëndësinë e qeverisjes fiskale dhe transparencës buxhetore, duke përfshirë analiza krahasuese me programet e mëparshme dhe masa për kontrollin e riskut fiskal, veçanërisht atij që buron nga ndërmarrjet publike dhe angazhimet afatgjata.
Reformat strukturore dhe konkurrueshmëria e ekonomisë
ERP 2026–2028 i kushton vëmendje të veçantë reformave strukturore, si bazë për rritjen e produktivitetit dhe konkurrueshmërisë. Prioritetet përfshijnë përmirësimin e klimës së biznesit, forcimin e kapitalit njerëzor, zhvillimin e aftësive profesionale dhe rritjen e efikasitetit të administratës publike.
Një rol të rëndësishëm zë edhe digjitalizimi i shërbimeve publike dhe modernizimi i institucioneve, si instrument për uljen e kostove administrative dhe rritjen e transparencës.
Lidhja me axhendën e integrimit europian
Programi i Reformave Ekonomike 2026–2028 është i ndërtuar në përputhje me kërkesat e Procesit të Zgjerimit të BE-së dhe shërben si dokument orientues për përmbushjen e kritereve ekonomike të anëtarësimit. Ai synon të forcojë koherencën ndërmjet politikave makro-fiskale dhe reformave strukturore, duke e pozicionuar Shqipërinë më afër standardeve të ekonomisë së tregut funksionale.
Në këtë kuadër, ERP mbetet jo vetëm një dokument planifikimi, por edhe një instrument monitorimi për progresin ekonomik të vendit në raport me Bashkimin Europian. /ekofin.al
