Agjencia e Administrimit të Pasurive të Sekuestruara dhe të Konfiskuara (AAPSK) po vijon të forcojë rolin e saj dhe bashkëpunimin me aktorë të ndryshëm, duke kthyer pasuritë e përfituara nga aktivitetet e paligjshme në mjete konkrete për zhvillim social dhe ekonomik. Këto pasuri, dikur simbole të paligjshmërisë dhe përfitimeve kriminale, sot po shndërrohen në burime të reja mundësish për komunitetet më në nevojë në vend.
Sot, në qytetin e Durrësit, u zhvillua një aktivitet domethënës në Qendrën “Art dhe Aktivizëm”, një hapësirë që deri pak kohë më parë ishte një pronë e sekuestruar nga autoritetet si pjesë e veprimeve për konfiskimin e aseteve të përfituara nga veprimtaritë kriminale. Falë angazhimit të AAPSK dhe bashkëpunimit me organizatat e shoqërisë civile, kjo pasuri është transformuar në një qendër kulturore që mbështet artistët e rinj, aktivistët dhe komunitetet vulnerabël.
Qendra shërben si një platformë për shprehje artistike dhe aktivizëm qytetar, duke ofruar trajnime, ekspozita dhe veprimtari ndërgjegjësuese për të rinjtë dhe grupet e margjinalizuara. Ky është vetëm një nga shumë projekte që po realizohen nga Agjencia me qëllim kthimin e pronave të konfiskuara në pasuri me ndikim social.
Në fjalën e saj gjatë aktivitetit, Kryeadministratorja e AAPSK, znj. Risena Xhaja, vuri theksin te rëndësia e përdorimit të pasurive të konfiskuara si mjete për të ndërtuar një shoqëri më të drejtë dhe gjithëpërfshirëse. “Është thelbësore që këto pasuri të mos mbeten thjesht asete të ngrira, por të shndërrohen në mundësi konkrete për komunitetin. Ripërdorimi social i tyre kontribuon jo vetëm në forcimin e shtetit të së drejtës, por edhe në zhvillimin social dhe ekonomik të vendit tonë,” deklaroi znj. Xhaja.
Aktualisht, AAPSK ka në administrim dhjetëra prona të konfiskuara, një pjesë e të cilave janë tashmë të dhëna për përdorim nga organizatat jofitimprurëse, institucionet publike dhe projektet sociale. Disa prej tyre janë kthyer në qendra trajnuese për të rinjtë, ambiente për qëndra komunitare, bujtina për viktimat e dhunës në familje, si dhe sipërmarrje sociale që punësojnë persona nga grupet më të rrezikuara.
Modeli shqiptar i administrimit të pasurive të konfiskuara po përshtatet gjithnjë e më shumë me praktikat më të mira të Bashkimit Evropian, ku ky koncept i “përdorimit social” të aseteve kriminale është kthyer në një instrument të fuqishëm për rikuperimin e pasurive publike dhe forcimin e besimit të qytetarëve te institucionet.
Në vijim, AAPSK ka planifikuar të zgjerojë bashkëpunimin me organizatat e shoqërisë civile dhe pushtetin lokal për të identifikuar nevoja specifike të komuniteteve dhe për t’iu përgjigjur atyre përmes vënies në dispozicion të pasurive të rekuperuara. Kjo qasje synon të forcojë solidaritetin social dhe të sjellë ndryshim të prekshëm në jetën e qytetarëve.
