Pagat mesatare në Europë ndryshojnë nga njëri vend në tjetrin. Historikisht, vendet e Europës Veriore dhe Perëndimore kanë të ardhurat mesatare neto më të larta, ndërsa vendet e Europës Lindore dhe Jugore raportojnë shifra disa herë më të ulëta.
Të ardhurat mesatare vjetore neto llogariten duke zbritur tatimet mbi të ardhurat dhe kontributet e sigurimeve shoqërore nga të ardhurat vjetore bruto dhe më pas duke shtuar shtesat familjare. Situata të ndryshme familjare, si të qenit beqar apo i martuar dhe numri i fëmijëve në ngarkim, ndikojnë në fitimet neto. Zvicra kryeson listën me një fitim mesatar vjetor prej 85,582 €, dukshëm më i lartë se çdo vend tjetër në rajon, sipas Eurostat. Pas Zvicrës, vijnë Islanda dhe Luksemburgu, aty ku fitimet mesatare neto arrijnë në respektivisht 53,885 € dhe 49,035 € në vit, ndjekur nga Norvegjia dhe Holanda me fitime neto mbi 45,000 €.
Fitimet mesatare neto në gjithë unionin arrijnë në 28,217 €. Vende si Franca (31,481 €) dhe Suedia (33,926 €) e kalojnë mesataren e BE-së, ndërsa të tjerët, duke përfshirë Italinë (24,207 €) dhe Spanjën (23,568 €), bien poshtë saj. Të gjitha këto shifra nxjerrin në pah diferencat e konsiderueshme të të ardhurave që ekzistojnë edhe midis kombeve më të pasura të Europës.
Në anën tjetër, vende si Turqia dhe Bullgaria raportojnë të ardhurat mesatare vjetore më të ulëta neto, përkatësisht 8,968 € dhe 9,355 €. Vendet e Europës Lindore si Rumania (11,105 €), Kroacia (12,330 €) dhe Hungaria (12,456 €) gjithashtu bien drejt fundit të shkallës së fitimeve.
