Një padi e bujshme për ngacmim seksual ndaj bankës JPMorgan Chase, e cila u përhap gjerësisht në rrjet, është cilësuar si “një fabrikim i plotë”, pasi personi që e ngriti akuzën – i identifikuar fillimisht si “John Doe” – u zbulua publikisht.
Sipas raportimit, paditësi është identifikuar si Chirayu Rana, një ish-punonjës i bankës, i cili kishte akuzuar një drejtuese të lartë, për më tepër shqiptare, për sjellje abuzive dhe ngacmim seksual. Ai pretendonte se ishte detyruar në marrëdhënie seksuale përmes presionit dhe kërcënimeve që lidhen me bonusin dhe karrierën e tij.
Megjithatë, një hetim i brendshëm i bankës nuk gjeti asnjë provë që mbështeste këto pretendime. Sipas JPMorgan, kontrolli përfshiu analiza të komunikimeve, si email-e dhe regjistra telefonikë, dhe përfundoi se akuzat nuk kishin bazë.
Gjithashtu, banka theksoi se paditësi nuk kishte bashkëpunuar me hetimin dhe nuk kishte dhënë informacion thelbësor për të mbështetur pretendimet e tij.
Një tjetër element që minon akuzat, sipas kompanisë, është fakti se drejtuesja e përmendur nuk ishte në linjë hierarkike mbi paditësin dhe nuk kishte ndikim mbi pagën apo bonuset e tij.
Padia, e paraqitur fillimisht në vitin 2025, u tërhoq më pas për “korrigjime”, ndërsa sipas burimeve, paditësi kishte tentuar të negocionte një pagesë të konsiderueshme për t’u larguar nga kompania.
Drejtuesja e akuzuar i ka mohuar kategorikisht të gjitha pretendimet dhe vazhdon të jetë në detyrë në bankë. Deri tani nuk është caktuar një datë gjyqi dhe çështja mbetet në zhvillim./Përshtati nga NY Post, ekofin.al
