Komisioni i Veprimtarive Prodhuese ka miratuar marrëveshjen e kredisë 70 mln euro për Operatorin e Shpërndarjes së Energjisë Elektrike, që do të shkojë për financimin e projektit për reagimin ndaj krizës së shkaktuar nga COVID-19.
Diskutimet u shoqëruan me debate midis ministres së Infrastrukturës dhe Energjisë, Belinda Balluku dhe deputetëve të opozitës, të cilët hodhën akuza për keqmenaxhimin e Kaskadës së Drinit.
Ndërkaq, deputetët ngritën pikëpyetje në lidhje me impaktin që COVID-19 ka patur për kompaninë publike, ndërkohë që administratori i OSHEE, Adrian Çela deklaroi se viti 2020 u mbyll me 2.4 mld lekë humbje për kompaninë që ai drejton.
Kredia prej 70 mln euro përbën një detyrim të drejtpërdrejtë për OSHEE-në, kundrejt Bankës Evropiane për Rindërtim dhe Zhvillim, por në rast të pamundësisë për të shlyer detyrimet nga OSHEE-ja, detyrimet e kredisë do të duhet të paguhen nga buxheti i shtetit, mbështetur në marrëveshjen e garancisë, që është nënshkruar në 8 shtator.
