Turizmi po shihet gjithnjë e më shumë si një instrument zhvillimi ekonomik për zonat rurale dhe periferike, ndërsa një numër në rritje vendesh po e përdorin atë për të krijuar vende pune dhe për të frenuar largimin e popullsisë.
Në raportin e fundit për turizmin, OECD vëren se përfitimet ekonomike të sektorit vazhdojnë të përqendrohen në një numër të kufizuar destinacionesh, duke lënë jashtë shumë rajone me potencial turistik. Për këtë arsye, politikat publike po orientohen drejt shpërndarjes më të gjerë të flukseve turistike dhe zhvillimit të produkteve rurale e natyrore.
Organizata argumenton se turizmi mund të krijojë burime të reja të ardhurash për komunitetet lokale, të mbështesë bizneset e vogla dhe të nxisë investime në infrastrukturë në zona që tradicionalisht kanë mbetur jashtë qendrave ekonomike.
Të dhënat e raportit tregojnë se intensiteti i aktivitetit turistik ndryshon ndjeshëm nga një rajon në tjetrin, çka nënkupton se potenciali ekonomik i sektorit mbetet i pashfrytëzuar në shumë zona. OECD rekomandon integrimin e turizmit në politikat e zhvillimit rajonal për të siguruar që përfitimet ekonomike të shpërndahen më gjerë.
Kanadaja, Kili dhe Sllovakia, janë në listën e shteteve të suksesshme, ku programet turistike janë përdorur për të mbështetur ekonomitë lokale, për të krijuar mundësi të reja biznesi dhe për të rritur të ardhurat në zonat rurale.
Për Shqipërinë, ky rekomandim lidhet drejtpërdrejt me zhvillimin e turizmit malor dhe agroturizmit. Rritja e flukseve turistike në Alpet Shqiptare, Theth, Valbonë, Përmet apo zonat e tjera rurale ka krijuar burime të reja të ardhurash për banorët lokalë dhe ka nxitur investime private në bujtina, restorante dhe shërbime turistike.
OECD sugjeron se shpërndarja më e balancuar e turistëve përtej bregdetit dhe sezonit veror mund të shërbejë jo vetëm si strategji turistike, por edhe si instrument zhvillimi rajonal dhe demografik. /ekofin.al
