Deri në orën 16:00 numëruesit në të gjithë vendin kanë numëruar 2599 kuti votimi nga 5225 që janë në të gjithë Shqipërinë, ose gati gjysmën e qendrave të votimit.
Nuk ka asnjë ndryshim nga trendi që u vu re që në orët e para të mëngjesit, ku Partia Socialiste kryeson thellë me numër mandatesh.
Kështu socialistët kanë deri tani 83 mandate, ku rezultatin më të mirë e kanë në Fier, Tiranë, Durrës dhe Elbasan.
Nga ana tjetër koalicioni i kryesuar nga Partia Demokratike nga 51 mandate që kishte, tashmë ka 50, pasi i lëviz një mandat duke e humbur ndaj Partisë Mundësia në Tiranë.
Sa i përket partive të reja, PSD-ja e Tom Doshit është forcë e tretë politike në Kuvend me 3 mandate, Partia e Agron Shehajt është aktualisht me 2 mandate, koalicioni “Nisma Shqipëria bëhet” ka 1 mandat, dhe Lëvizja Bashkë një mandat.
Socialistët udhëheqin gjithashtu në votat e diasporës, me një diferencë edhe më të thellë në përqindje sesa në votimet e kryera brenda vendit, ku deri tani kanë marrë mbi 55% të votave.
