Vijon procesi i numërimit të votave në të gjithë vendin. Kur janë numëruar mbi 25% e votave, trendi duket i qartë për një fitore shumë të thellë të Partisë Socialiste, e cila po i drejtohet madje shumicës së cilësuar në Parlament, ku kërkohen minimalisht 84 vota.
Sipas, vlerësimeve paraprake, PS merr 52.7% të totalit të votave të numëruara deri më tani, duke siguruar 83 mandate në Kuvend. Në anën tjetër, PD dhe aleatët kanë pësuar rënie të fortë krahasuar me 2021. Aktualisht ASHM ka 34.3% të votave ose 51 mandate, nga 63 në vitin 2021 (59 të PD dhe 4 të LSI).
Nga 1445 QV të numëruara, nga 5225 në total, Partia Socialdemokrate ka marrë 13,219 vota (3.7%) dhe ka siguruar 3 mandate. Koalicioni Nisma Shqipëria Bëhet me 12,367 vota (3.5%) dhe Partia Mundësia me 9,310 vota (2.6%), që u përkthehet deri më tani nga 1 mandat. Po ashtu, edhe Lëvizja Bashkë me 4,407 vota (1.2%) dhe merr 1 mandat.
Forcat e tjera politike: Partia Koalicioni Euroatlantik me 3,900 vota (1.1%), Koalicioni Djathtas për Zhvillim me 1,260 vota (0.4%), Partia Aleanca Demokracia e Re me 263 vota (0.1%), Partia Aleanca Kombëtare Shqiptare me 677 vota (0.2%) dhe Lëvizja Atdheu me 458 vota (0.1%).
Edhe diaspora deri tani ka votuar për socialistët. Janë numëruar 977 zarfe të dërguar nga emigrantët, ku PS ka 47,23%, e ndjekur nga PD me 38,60%. Nëse konfirmohet ky rezultat, PS do të siguronte rezultatin më të thellë të arritur ndonjëherë nga një forcë politike në kohën e pluralizmit.
