Disa sektorë në Bashkimin Evropian kanë hasur vështirësi për të plotësuar vendet e lira të punës në periudhën pas COVID-19, ndërsa në sektorë të tjerë norma e vendeve vakante ka rënë, duke sugjeruar më pak vështirësi në rekrutim.
Tregu i punës në Evropë mbetet relativisht i fortë në fillim të vitit 2026, me nivele rekord të punësimit, pavarësisht ngadalësimit ekonomik dhe paqëndrueshmërisë globale.
Megjithatë, pavarësisht qëndrueshmërisë së përgjithshme, disa sektorë po përballen me mungesë të theksuar të punonjësve dhe po hasin vështirësi për të mbushur boshllëqet e krijuara pas pandemisë COVID-19.
Të dhënat e reja të publikuara nga Eurostat tregojnë se midis vitit 2019 — para pandemisë — dhe vitit 2023, punëtorët në industrinë prodhuese regjistruan rritjen më të madhe të normës së vendeve vakante, me një rritje prej 4.2 për qind.
Kjo rritje sugjeron se sektori pati më shumë vështirësi në gjetjen e punonjësve gjatë kësaj periudhe. Kufizimet e vendosura gjatë pandemisë shkaktuan ndërprerje të mëdha në zinxhirët e furnizimit dhe largimin e shumë punonjësve nga industria prodhuese.
Kur aktiviteti ekonomik filloi të rikthehej në normalitet, industria përjetoi një rimëkëmbje të shpejtë për të rritur prodhimin dhe për të përmbushur kërkesën në rritje, duke krijuar nevojë për më shumë punonjës.
Normat e tjera më të larta të vendeve vakante u regjistruan te pozicionet e menaxherëve të shitjeve, marketingut dhe zhvillimit me 3 për qind, punonjësit e shitjeve me 2.8 për qind, punëtorët e transportit dhe magazinimit me 2.5 për qind dhe punonjësit e tjerë të mbështetjes administrative me 2.4 për qind, sipas Eurostat.
Megjithatë, jo të gjitha profesionet kanë ndjekur të njëjtin trend — disa sektorë kanë parë rënie të normës së vendeve vakante gjatë së njëjtës periudhë.
Rëniet më të mëdha u regjistruan te teknikët e shkencave të jetës me -2.6 për qind, profesionistët e bazave të të dhënave dhe rrjeteve me -1.7 për qind dhe zhvilluesit e softuerit dhe analistët me -1.5 për qind.
Disa ekspertë e lidhin këtë rënie pjesërisht me rritjen e automatizimit dhe inteligjencës artificiale. Ndërsa kërkesa mbetet e lartë për role shumë të specializuara si shkenca e të dhënave apo terapia gjenike, kjo nuk është domosdoshmërisht e vërtetë për punët më manuale ose ato të përqendruara vetëm në kërkim.
Megjithatë, sipas Eurostat, rënia e normës së vendeve vakante nuk do të thotë domosdoshmërisht se këto profesione janë në tkurrje, por më tepër se ato kanë hasur më pak vështirësi në rekrutim.
Për shembull, edhe pse norma e vendeve vakante për profesionistët e bazave të të dhënave dhe rrjeteve ra në 5.1 për qind, ajo mbeti shumë mbi mesataren për të gjitha profesionet, e cila ishte 2.4 për qind.
Madje, pjesa e punonjësve në këtë sektor u rrit me 0.2 për qind midis viteve 2019 dhe 2023.
Një zhvillim i ngjashëm u vu re edhe për zhvilluesit e softuerit dhe analistët, ku norma e vendeve vakante ra në 6.9 për qind në vitin 2023, por pjesa e punonjësve në këtë sektor u rrit me 0.5 për qind gjatë kësaj periudhe.
Në të kundërt, disa sektorë ku norma e vendeve vakante u rrit panë një rënie të pjesës së tyre në punësim. Ky ishte rasti për punëtorët e transportit dhe magazinimit, me një rënie prej 0.2 për qind, dhe punonjësit e shitjeve, me një rënie prej 0.1 për qind, midis viteve 2019 dhe 2023./Përshtati nga Euronews, ekofin.al
