Qeveria do të emetojë për herë të parë një Obligacion 20-vjeçar, i cili në kalendarin e emetimeve të Ministrisë së Financave cilësohet si testim tregu.
Ankandi i parë i këtij obligacioni parashikohet të zhvillohet më 28 Janar 2025 dhe kjo do të jetë hera e parë që tregtohet një titull i tillë. Pas shumë vitesh hezitim, për herë të parë u testua tregu me Obligacionin 15-vjeçar në vitin 2021 dhe ai rezultoi shumë atraktiv për investitorët.
Burime nga Ministria e Financave i thanë Ekofin.al se Obligacioni me maturim 20-vjeçar do të testohet vitin e ardhshëm, pas preferencave dhe kërkesave të investitorëve, kryesisht fondeve të pensioneve për investime më afatgjata, më të qëndrueshme dhe me përfitueshmëri më të lartë në Titujt e Borxhit të Qeverisë. Financat bënë me dije se ky instrument do të emetohet në muajin Janar dhe Qershor, si edhe do të rihapet në muajin Mars dhe Shtator.
Në emetimin e parë të këtij lloji, atë të parashikuar në fund të Janarit, shuma e planifikuar për emetim është 1.5 miliardë Lekë, ndërsa në rihapjen në mars do të emetohen edhe 1 miliardë Lekë të tjera, për një total prej 2.5 miliardë Lekë. E njëjta gjë parashikohet të përsëritet edhe në dy ankandet e tjera të Obligacionit 20-vjeçar, në Qershor dhe Shtator.
Rritja e afatit të maturitetit të titujve të borxhit është tregues i konsolidimit të borxhit të Qeverisë, i cili që këtë vit parashikohet të zbresë në nivelin 55%, ndërkohë që arriti në vitin 2021 nivelin më të lartë prej 74%. Përmirësimi i treguesve të borxhit solli edhe rritje për herë të parë të vlerësimit për Shqipërinë nga agjencitë e vlerësimit të kreditit, Standard&Poor’s dhe Moody’s.
Mbetet për t’u parë se cilat do të jenë interesat e kuponit të Obligacionit 20-vjeçar, në kushtet kur viti 2024 po mbyllet me të tendencë rënëse të tyre, edhe pas lëvizjeve të BSH në uljen e normave, përkundrejt inflacionit tashmë në dukje të stabilizuar. Në çdo rast, ky lloj titull borxhi parashikohet të jetë atraktiv për investitorët dhe kjo do testohet që në ankandin e parë, atë të 28 Janarit. /ekofin.al
