Bordi i Transparencës ka vendosur këtë të enjte një tjetër rritje të çmimit të karburanteve në tregun vendas, duke e çuar çmimin tavan të naftës në 195 lekë për litër, ose 4 lekë më shumë krahasuar me vendimin e mëparshëm.
Sipas vendimit të miratuar më 4 qershor 2026, çmimi maksimal i shitjes me pakicë i gazoilit do të jetë 195 lekë/litër, ndërsa ai me shumicë 183 lekë/litër. Ndërkohë, benzina do të tregtohet me jo më shumë se 175 lekë/litër në pakicë dhe 163 lekë/litër në shumicë.
Çmimet e reja hynë në fuqi menjëherë, nga ora 15:30 e datës 4 qershor, dhe do të mbeten në fuqi deri në vendimin e ardhshëm të Bordit.
Rritja e fundit vjen pas një periudhe relativisht të qëndrueshme të çmimeve në tregun vendas. Vetëm pak ditë më parë, çmimi tavan i naftës ishte deri në 191 lekë për litër, ndërsa tashmë rikthehet në nivelin 195 lekë, duke reflektuar luhatjet e tregjeve ndërkombëtare të hidrokarbureve.
Një element i veçantë mbetet çmimi i karburantit për sektorin e peshkimit. Referuar përjashtimeve fiskale që gëzojnë anijet e peshkimit nga taksa e qarkullimit, taksa e karbonit dhe akciza, çmimi i gazoilit për këtë kategori është përcaktuar në vetëm 100 lekë për litër.
Bordi i Transparencës paralajmëroi operatorët e tregut se zbatimi i çmimeve të miratuara është i detyrueshëm. Në rast të konstatimit të shkeljeve, autoritetet paralajmërojnë masa të ashpra administrative deri në pezullimin e aktivitetit të subjektit.
Rritja e re e çmimit të naftës vjen në një periudhë kur transporti, bizneset dhe konsumatorët vijojnë të ndjejnë ndikimin e kostove të energjisë mbi buxhetet e tyre, ndërsa tregu mbetet i ndjeshëm ndaj zhvillimeve gjeopolitike dhe luhatjeve të çmimeve të naftës në bursat ndërkombëtare./ekofin.al
