Vitet e fundit shumë vende evropiane vuajnë mungesën e mjekëve dhe disa shtete janë duke rekrutuar gjithmonë e më shumë mjekë nga vende të tjera.
Sa mjekë ushtrojnë profesionin në Evropë?
Sipas të dhënave të Eurostat, në vitin 2022, kishte rreth 1.83 milionë mjekë në BE, dhe mes tyre, mbi 481 000 ishin mjekë të përgjithshëm. Mjekët e përgjithshëm (GP) ofrojnë kujdes mjekësor gjithëpërfshirës për një gamë të gjerë çështjesh shëndetësore, duke mos u kufizuar në një fushë mjekësore ose sëmundje të caktuar.
Holanda kryesonte për sa i përket raportit të mjekëve të përgjithshëm, me 183.4 për 100 000 njerëz, e ndjekur nga Irlanda (174.1), Austria (146.1) dhe Qiproja (137.7).
Një raport i lartë i mjekëve të përgjithshëm, me 304.3 për 100 000 banorë, u raportua nga Portugalia, megjithatë, kjo shifër u referohet mjekëve të licencuar, në vend të mjekëve të përgjithshëm në detyrë, duke e bërë atë jo drejtpërdrejt të krahasueshme.
Në të kundërt, raporti më i ulët u regjistrua në Greqi (licencuar për të ushtruar detyrën) me 45.8 për 100 000 banorë, kjo u pasua nga Bullgaria (59.8), Suedia (62.2, të dhënat 2021) dhe Sllovenia (68.8), e ndjekur nga afër nga Hungaria (68.9).
Ku mund të gjejmë fuqinë punëtore mjekësore më të re dhe më të vjetër?
Kur bëhet fjalë për moshën e mjekëve praktikantë, përqindja e profesionistëve më të rinj (nën 35 vjeç) dhe më të vjetër (55 vjeç e lart) ndryshonte ndjeshëm midis vendeve. Megjithatë, është e qartë se fuqia punëtore mjekësore po plaket me shpejtësi, me 12 vende të BE-së që raportojnë se pjesa e mjekëve të moshës 55 vjeç e lart ishte më e madhe se 40.0% në 2022.
Gjermania kishte përqindjen më të lartë të mjekëve të moshës 55-64 vjeç me 36.1%, e ndjekur nga Bullgaria (33.9%) dhe Letonia (27.4%), ndërsa Italia regjistroi përqindjen më të lartë të mjekëve 65 vjeç e lart me 26.7%.
Në këtë kategori moshe, Italia u pasua nga Hungaria (22.4%) dhe Estonia (22.3%). Në të kundërt, Malta kishte përqindjen më të lartë të mjekëve të rinj me 46.1%, e ndjekur nga Rumania (34.6%) dhe Holanda (29.7%). /Përgatiti: ekofin.al
