Qeveria ka miratuar katër vendime të reja që shpallin gjithsej 32 zona me përparësi zhvillimin e ekonomisë malore në bashkitë Cërrik, Këlcyrë, Lushnjë dhe Poliçan, në vijim të zbatimit të ligjit nr.20/2025 “Për paketën e maleve”.
Në Bashkinë Cërrik janë shpallur 14 zona, të shpërndara në njësitë administrative Klos, Shalës, Gostimë, Mollas dhe Cërrik, me një sipërfaqe totale prej 1,958 hektarësh. Zonat përfshijnë fshatra si Floq, Liçaj, Banjë, Malasej, Xherie, Qafë, Selitë, Shtepanj, Shtermen, Shushicë dhe Topojan, por edhe një zonë që përfshin disa fshatra njëherësh, si dhe territor në qytetin e Cërrikut.
Pesha kryesore e këtyre vendimeve bie mbi Bashkinë Këlcyrë, ku janë shpallur 8 zona me një sipërfaqe totale prej 24,693 hektarësh. Shtrirja përfshin dhjetëra fshatra në njësitë administrative Ballaban, Sukë, Dëshnicë dhe Këlcyrë, duke e bërë këtë bashki përfituesen më të madhe mes katër vendimeve të reja.
Në Bashkinë Lushnjë janë shpallur 5 zona me përparësi zhvillimi, me sipërfaqe totale 177 hektarë, të vendosura në Kolonjë, Hysgjokaj, Dushk dhe Karbunarë. Ndërsa në Bashkinë Poliçan janë shpallur 5 zona të tjera, me një sipërfaqe të përgjithshme prej 11,547 hektarësh, të përqendruara kryesisht në njësitë administrative Vërtop dhe Tërpan.
Në të katër bashkitë, aktivitetet që do të lejohen në këto zona janë të zhvillimit ekonomik, industrial dhe turistik. Për zbatimin e vendimeve janë ngarkuar Ministria e Ekonomisë dhe Inovacionit, Agjencia Shtetërore e Kadastrës dhe bashkitë përkatëse, ndërsa aktet do të hyjnë në fuqi pas botimit në Fletoren Zyrtare. / ekofin.al
