Shqipëria po përfaqësohet në mbledhjen vjetore të nivelit të lartë të Fondit Ndërkombëtar Monetar dhe Bankës Botërore në Uashington DC, SHBA, nga ministri i Financave Petrit Malaj dhe Guvernatori i BSh, Gent Sejko.
Këto mbledhje përfaqësojnë një forum të nivelit të lartë, ku vendimmarrësit më të lartë të FMN-së dhe BB-së, së bashku me guvernatorët dhe ministrat e financave të vendeve anëtare në këto institucione ndërkombëtare financiare, mblidhen së bashku për të diskutuar zhvillimet më të fundit të ekonomisë botërore.
Gjatë takimeve me përfaqësuesit e FMN-së dhe BB-së, Guvernatori Sejko prezantoi zhvillimet më të fundit në ekonominë shqiptare. Gjatë pjesëmarrjes në këto mbledhje, Sejko zhvilloi disa takime të rëndësishme me personalitete të njohura të fushës financiare ndërkombëtare, si dhe me Matteo Bugamelli, drejtor ekzekutiv për Shqipërinë pranë Bankës Botërore, me të cilin diskutoi mbi nevojën dhe rëndësinë e vazhdimit të bashkëpunimit të shkëlqyer midis institucioneve dhe vijimit të ofrimit të asistencës teknike në të ardhmen.
Në takimin me guvernatorët e bankave qendrore të Ballkanit Perëndimor, pëfaqësues të BB dhe zëvendësguvernatoren e Bankës së Italisë, Chiara Scotti, u ndal në zhvillimin e mëtejshëm të sistemit të pagesave, siç është zbatimi i projektit për pagesat në kohë reale (Instant Payment) dhe me kosto më të ulët për qytetarët si dhe sfidat e inovacionit në teknologji.
Ndërsa ministri i Financave Petrit Malaj mori pjesë në ministerialin e organizuar nga Banka Botërore për rritjen e efektivitetit të projekteve të zhvillimit, në të cilin u propozuan dy iniciativa të reja për të përshpejtuar zbatimin dhe impaktin e projekteve.
Sipas njoftimit të Ministrisë së Financave, iniciativa e parë ka të bëjë me mobilizimin e granteve për përgatitjen e projekteve pa rënduar borxhin publik, duke përmirësuar kohën e përgatitjes dhe cilësinë.
Propozimi i dytë është ngritja e një akademie për të rritur kapacitetin e punonjësve të administratës për të menaxhuar projekte të ndryshme.
Nga ana e saj, Ministria e Financave mbështeti këto inciativa të dobishme për përmirësimin e zbatimit të projekteve dhe theksoi hapat e ndjekura nga qeveria shqiptare.
“E para ka të bëjë me përputhjen më të mirë të propozimeve të investimeve me Programin Buxhetor Afatmesëm dhe e dyta me përmirësimin e proceseve të prokurimit, mundësisht duke përdorur Inteligjencën Artificiale”, njoftoi Ministria e Financave.
