Microsoft ka ofruar të zgjerojë diferencën e çmimeve midis produktit të tij “Office” të shitur së bashku me aplikacionin për biseda dhe video “Teams” dhe softuerin e tij të shitur pa aplikacion, si përpjekje për të shmangur një gjobë të mundshme antitrust të BE-së, sipas tri burimeve.
Lëvizja e gjigantit të teknologjisë amerikane vjen pesë vjet pasi “Slack” në pronësi të “Salesforce” u ankua në Komisionin Evropian për lidhjen e Microsoft të Teams me Office. Në vitin 2023, rivali gjerman “Alfaview” paraqiti një ankesë të ngjashme tek mbikëqyrësi i BE-së.
“Teams” u shtua në Office 365 në 2017 falas dhe pasi zëvendësuan “Skype për Biznes”, u bënë të njohura gjatë pandemisë pjesërisht për shkak të videokonferencave.
Shtrenjtimi i “Office with Teams” mund t’i ndihmojë rivalët të ofrojnë produktet e tyre me çmime konkurruese dhe t’i joshin përdoruesit që të kalojnë tek ato.
Microsoft ndau “Teams” nga Office në 2023, duke shitur “Office” pa “Teams” për 2 euro më pak se Office me aplikacionin video. Ai tha se applikacioni “Teams” i pavarur do të shitej për 5 euro në muaj.
Komisioni u ka kërkuar komente disa kompanive, duke u dhënë atyre afat deri në këtë javë që të përgjigjen, përpara se të vendosë nëse do të bëjë një test formal tregu, thanë të tre personat, të gjithë me njohuri të drejtpërdrejtë për këtë çështje.
Ata thanë se Microsoft ka ofruar gjithashtu kushte më të mira ndërveprueshmërie për ta bërë më të lehtë për rivalët të konkurrojnë.
Zbatuesi i konkurrencës i BE-së dhe Microsoft, të cilët grumbulluan 2.2 miliardë euro (2.3 miliardë dollarë) gjoba antitrust të BE-së dy dekada më parë për lidhjen ose bashkimin e dy ose më shumë produkteve së bashku, nuk pranuan të komentojnë.
Gjobat e BE-së mund të arrijnë 10% të të ardhurave vjetore globale të një kompanie.
Nëse Komisioni e pranon ofertën e Microsoft-it pa gjobë ose pa konstatim për shkelje, fuqia e tij punëtore dhe burimet do të përqendroheshin në hetimet ndaj Apple dhe Google, tha një nga burimet.
