Prodhuesi gjerman i makinave premium Mercedes-Benz raportoi një rritje prej 22% të fitimit operativ në tremujorin e dytë, por njëkohësisht uli parashikimin për shitjet e makinave gjatë gjithë vitit, për shkak të dobësimit të vazhdueshëm të tregut në Kinë.
Aksionet e Mercedes-Benz u rritën me më shumë se 5% në bursën e Frankfurtit të martën në mëngjes, pasi kompania publikoi fitime më të larta për tremujorin e dytë, ndërsa paralajmëroi se dobësia e vazhdueshme në tregun kinez do të ndikojë negativisht në shitjet e makinave gjatë këtij viti.
Kompania theksoi se, “veçanërisht zhvillimi negativ i tregut kinez”, ka bërë që shitjet e njësisë Mercedes-Benz Cars të pritet të jenë pak më të ulëta krahasuar me vitin e kaluar.
Sipas përkufizimeve të përdorura në raportin vjetor të kompanisë për vitin 2025, kjo mund të përkthehet në një rënie prej 2% deri në 7.5% të shitjeve të makinave për të gjithë vitin. Si pasojë e këtij parashikimi më të dobët, Mercedes-Benz pret gjithashtu që të ardhurat e grupit të jenë pak më të ulëta se ato të vitit të kaluar. Më parë, kompania kishte parashikuar që shitjet e makinave dhe të ardhurat të mbeteshin përgjithësisht të qëndrueshme.
Ky parashikim i rishikuar u publikua së bashku me rezultatet financiare të tremujorit të dytë.
Mercedes-Benz raportoi një fitim operativ prej 1.55 miliardë eurosh në tremujorin e dytë, në rritje me 22% nga 1.27 miliardë euro një vit më parë. Ndërkohë, të ardhurat ranë me 3%, në 32.1 miliardë euro, nga 33.2 miliardë euro.
Drejtori i Përgjithshëm Ekzekutiv i Mercedes-Benz Group AG, Ola Källenius, deklaroi:
“Pavarësisht një mjedisi sfidues të tregut, ne qëndruam në rrugën e duhur gjatë tremujorit të dytë, ndërsa vazhduam të avancojmë programin tonë të lançimit të modeleve të reja. Reagimi i klientëve ndaj modeleve të reja ka qenë shumë pozitiv, me shitjet e automjeteve plotësisht elektrike të Mercedes-Benz Cars që u rritën me 51%, ndërsa porositë për këto automjete në Evropë u më shumë se dyfishuan gjatë tremujorit.”
Performanca e përgjithshme e kompanisë u mbështet nga divizionet e furgonëve dhe të shërbimeve financiare. Megjithatë, fitimi operativ i rregulluar i divizionit kryesor të makinave ra me 26%, në 909 milionë euro, pasi konkurrenca më e fortë në Kinë ushtroi presion mbi fitimet.
Shitjet në Kinë bien me 30%, ndërsa rriten në Evropë
Mercedes-Benz ia atribuoi rënien e fitimeve në divizionin e makinave përkeqësimit të kushteve të tregut, veçanërisht në Kinë, si edhe një kombinimi më pak fitimprurës të modeleve të shitura dhe kostove që lidhen me përditësimet e produkteve dhe lançimin e modeleve të reja. Kursimet në efikasitet ndihmuan pjesërisht në zbutjen e këtyre presioneve.
Shitjet e automjeteve plotësisht elektrike Mercedes-Benz u rritën me 51% krahasuar me një vit më parë, duke arritur në 52,852 njësi gjatë tremujorit të dytë. Kjo u nxit nga një rritje prej 87% në Evropë.
Në total, shitjet e makinave u rritën me 4% në Evropë dhe me 10% në Shtetet e Bashkuara të Amerikës.
Kjo kompensoi pjesërisht rënien prej 30% në Kinë, ku konkurrenca e fortë, kërkesa e dobët dhe ndryshimet në gamën e modeleve të kompanisë vazhduan të ndikojnë negativisht në shitje. Duke përjashtuar Kinën, shitjet globale të makinave u rritën me 2% krahasuar me të njëjtën periudhë të vitit të kaluar.
Fitimi operativ i raportuar i divizionit të makinave ra në vetëm 49 milionë euro, nga 783 milionë euro një vit më parë. Ky rezultat përfshinte zhvlerësime në vlerën 704 milionë euro të lidhura me investimet në Kinë. Këto regjistrime kontabël nuk sollën dalje reale të parave gjatë tremujorit dhe nuk u përfshinë në fitimin operativ të rregulluar.
“Tregu kinez dhe klientët në Kinë mbeten me rëndësi të lartë strategjike për Mercedes-Benz”, deklaroi kompania.
Prodhuesit gjermanë të makinave premium nuk kanë shpëtuar nga konkurrenca e ashpër në Kinë, e cila ka goditur edhe prodhuesin e makinave për tregun masiv Volkswagen.
Porsche njoftoi të hënën se do të shkurtojë edhe 5,000 vende pune deri në vitin 2035, duke e çuar numrin total të vendeve të planifikuara për t’u shkurtuar në rreth 9,000. Ndërkohë, BMW uli në qershor parashikimin për marzhin e fitimit të divizionit të automobilëve për të gjithë vitin në 1% deri në 3% dhe njoftoi se po përgatit masa të tjera për uljen e kostove.
Për të gjithë vitin, Mercedes-Benz pret që tregu global i makinave të mbetet i dobët. Shitjet në Evropë parashikohet të mbeten në nivelet e vitit të kaluar, ndërsa tregu amerikan pritet të jetë disi më i vogël. Në Kinë, tregu pritet të jetë dukshëm më i dobët se një vit më parë.
Mercedes-Benz synon zgjerimin në sektorin e mbrojtjes
Kompania ka identifikuar gjithashtu automjetet për sigurinë dhe mbrojtjen si një “fushë strategjike zhvillimi”. Ajo planifikon të zgjerojë angazhimin në këtë sektor, ndërsa qeveritë po reagojnë ndaj ndryshimeve në mjedisin global të sigurisë.
Mercedes-Benz bëri të ditur se do të mbështetet në më shumë se 45 vite përvojë në furnizimin me automjete për sigurinë, shërbimet e emergjencës dhe mbrojtjen, duke përfshirë versione të modifikuara të modeleve G-Class, Sprinter dhe Vito.
Si pjesë e kësaj strategjie, prodhuesi gjerman ka nënshkruar një memorandum mirëkuptimi me kompaninë gjermane të mbrojtjes TYTAN, me seli në Mynih, për të shqyrtuar mundësinë e një partneriteti.
Dy kompanitë do të eksplorojnë bashkëpunimin në zhvillimin e aplikacioneve të mbrojtjes të bazuara në automjete, përfshirë një sistem kundër dronëve të bazuar në modelin G-Class, si dhe një njësi të lëvizshme transporti dhe komande për dronë, të bazuar në modelin Sprinter./Përshtati nga Euronews, ekofin.al
