Bizneset shqiptare dhe investitorët e huaj do të mblidhen në panairin pranveror në Pallatin e Kongreseve në datën 27 mars 2025. Aktiviteti i rëndësishëm organizohet për herë të parë në Shqipëri nga Agjencia Shqiptare për Zhvillimin e Investimeve (AIDA).
Panairi “Match Maker Albania” do të bëjë bashkë investitorë nga 20 shtete dhe eksportuesit më të mëdhenj në Shqipëri në një gamë të gjerë sektorësh përshirë hotelerinë, industrinë ushqimore, bimët medicinale, përpunimin “Pije & Ushqim”, “Bimë medicinale”, “Përpunim Metalesh dhe Druri etj.
Në këtë ngjarje të rëndësishme për zhvillimin e bizneseve do të bashkohen në një vend për herë të parë 500 investitorë ndërkombëtarë, rreth 200 investitorë shqiptarë, si edhe 30 eksportues shqiptarë. Gjithashtu, pjesë e panairit do të jenë 30 projekte private dhe shtetërore për të investuar.
Në listën e pjesëmarrësve vërehen brandet e hotelerisë si “Melia”, “Maritim”, “Marriott”, “Radisson”, “Hilton Garden Inn”, “Mercure” dhe “Movenpick Group”.
Eventi parashikohet në 2 panele kryesore, ku pritet të flasin Kryeministri Edi Rama, përfaqësues të ministrive kryesore, Koorporatës së Investimeve Shqiptare, disa prej CEO-ve të bizneseve rajonale të Maqedonisë së Veriut dhe Malit të Zi si dhe Greqisë etj, të cilët do të ndajnë edhe ekspertizën e tyre.
Projektet shqiptare më të suksesshme si “Green Cost”, “Marina Orikum & San Pietro”, “Lift Tower”, “Rozafa”, “Durana Technopark” etj., do të jenë pjesë e prezantimit.
Nuk do të mungojnë as paraqitja dhe testimi i produkteve shqiptare, verërave dhe ushqimit, si dhe argëtimi për pjesëmarrësit.
Panari pritet të përmbyllet me nënshkrimin e memorandumeve të bashkëpunimit dhe me një event kulturor me valle dhe muzikë shqiptare. Gjithashtu paralelisht me eventin është parashikuar edhe këndi mediatik, ku të pranishmit do të japin mesazhe, intervista dhe do të komunikojnë me publikun përmes medias. /ekofin.al
