Kryeqyteti do të përballet sot me kufizime të mëdha të qarkullimit rrugor për shkak të organizimit të Maratonës së Tiranës. Nga ora 08:00 deri në 16:00, një pjesë e konsiderueshme e akseve kryesore të qytetit do të jenë të bllokuara, ndërsa transporti publik do të pësojë ndryshime të rëndësishme, deri në pezullimin e plotë të disa linjave.
Aktiviteti sportiv, i organizuar nga Bashkia e Tiranës, pritet të sjellë vështirësi të konsiderueshme për lëvizjen e qytetarëve, veçanërisht për ata që duhet të udhëtojnë drejt qendrës, të shkojnë në punë apo të kryejnë aktivitete të tjera gjatë fundjavës.
Sipas njoftimit kufizimet do të prekin jo vetëm rrugët e qendrës, por edhe disa prej arterieve kryesore që lidhin pjesët e ndryshme të kryeqytetit.
Ndër akset kryesore që preken janë:
* Sheshi “Nënë Tereza”
* Bulevardi “Dëshmorët e Kombit”
* Bulevardi “Zogu I”
* Bulevardi i Ri
* Rruga e Durrësit
* Rruga e Kavajës
* Rruga “Myslym Shyri”
* Rruga “Ismail Qemali”
* Rruga “George W. Bush”
* Rruga “Gjergj Filipi”
* Rruga “Papa Gjon Pali II”
* Rruga “Urani Pano”
* Rruga “Ismail Ndroqi”
* Rruga “Abdi Toptani”
* Rruga “Ded Gjo Luli”
* Rruga “Ibrahim Rugova”
* Rruga “Lek Dukagjini”
* Rruga “Luigj Gurakuqi”
* Rruga e Dibrës
* Rruga e Barrikadave
* Rruga “Mine Peza”
* Rruga “Vaso Pasha”
Kufizimet përfshijnë edhe segmente të Unazës së Mesme, me përjashtim të segmentit nga ura e Gjykatës së Rrethit Tiranë deri te Rruga e Elbasanit.
Ndërkohë, bllokime do të ketë në bulevardin “Zhan D’Ark”, nga kryqëzimi me rrugën “George W. Bush” deri te bulevardi “Dëshmorët e Kombit”, si dhe në bulevardin “Bajram Curri”, nga kryqëzimi me urën e Gjykatës deri te ura e Rrugës së Elbasanit.
Edhe bulevardi “Gjergj Fishta” do të ketë kufizime nga kryqëzimi me bulevardin “Dëshmorët e Kombit” deri te kryqëzimi me urën e Gjykatës së Rrethit Tiranë.

Për të administruar qarkullimin gjatë zhvillimit të maratonës, Bashkia e Tiranës ka përcaktuar 11 pika ku automjetet do të detyrohen të ndryshojnë drejtim.
Mes tyre përfshihen kryqëzimi i Rrugës së Elbasanit me bulevardin “Zhan D’Ark”, kryqëzimi i Rrugës së Dibrës, kryqëzimi i Rrugës “Hoxha Tahsim”, si dhe ai i bulevardit “Zogu I” me rrugën “Fortuzi”.
Devijime do të ketë gjithashtu në rrugën “Mine Peza”, në kryqëzimin “21 Dhjetori”, në rrugën “Myslym Shyri” dhe në kryqëzimin “Vasil Shanto”.
Në disa prej këtyre pikave, automjetet do të orientohen drejt Rrugës së Barrikadave, Rrugës “Tefta Tashko Koço” dhe Rrugës “Ibrahim Rugova”.
Kjo situatë pritet të ndikojë edhe në akset që nuk janë pjesë e itinerarit të maratonës, pasi drejt tyre do të zhvendoset një pjesë e trafikut.
Kufizimet nuk do të prekin vetëm automjetet private. Edhe transporti publik urban do të pësojë ndryshime të konsiderueshme.
Sipas njoftimit të Bashkisë, pesë linja urbane do të pezullohen përkohësisht gjatë orarit të kufizimeve.
Bëhet fjalë për: Linjën 1/A, Selitë – Kristal – Qendër – Stacioni i Trenit – Allias; Linjën 1/B, Kodra e Diellit 2 – Kristal – Qendër – Stacioni i Trenit – Allias; Linjën 9, Qyteti Studenti – Jordan Misja; Linjën 11, Porcelani dhe Linjën 16, Linja e Gjelbër.
Përveç linjave të pezulluara, disa linja të tjera do të funksionojnë me itinerare të ndryshuara.
Linja 8, që lidh zonën e Ish-Stacionit të Trenit me Qendrën, Saukun dhe Tegun, do të devijojë te Rruga e Elbasanit, me rrethrrotullim në Qytetin Studenti.
Linja 10/A, Marteniteti i Ri – Qendër – Ish-Fusha e Aviacionit, do të devijojë te ura e Rrugës së Elbasanit.
Linjat 12/A dhe 12/B, që lidhin zonat e Sharrës me pjesë të tjera të kryeqytetit, do të devijojnë te kryqëzimi i “21 Dhjetorit”, drejt urës “Vasil Shanto” dhe më tej te Pallatet me Shigjeta. Pjesa tjetër e itinerarit do të pezullohet përkohësisht.
Ndryshime do të ketë edhe për linjën 13, Tirana e Re, e cila do të devijojë te Sheshi “Wilson”, ndërsa linja 15, Kombinat – Kinostudio, do të përdorë segmente alternative përmes Rrugës së Kavajës, Rrugës “Muhamet Gjollesha” dhe Rrugës së Barrikadave.
Një tjetër masë e rëndësishme është ndalimi i qarkullimit të automjeteve të transportit të përzier, transportit teknologjik dhe transportit të pasagjerëve në brendësi të Unazës së Madhe.
Nga ky kufizim përjashtohen mjetet e transportit urban qytetas, të cilat do të operojnë sipas itinerareve të lejuara.
Masa do të zbatohet më 15 nëntor, nga ora 08:00 deri në 16:00. /ekofin.al
