Ministria e Bujqësisë dhe Zhvillimit Rural përmes një deklarate ka sqaruar sipas versionit të saj çështjen e disa ngarkesave me mandarina, të ndaluara dhe të kthyera mbrapsht në kufijtë e Bashkimit Evropian, për shkak se janë gjetur me sasi tej normave të pesticideve, shumë të dëmshme për organizmin.
Ministria thotë se nga 924 kamionë të eksportuar, vetëm tre ngarkesa janë konstatuar me probleme. Një prej tyre është kthyer dhe asgjësuar në Shqipëri, ndërsa dy të tjera janë trajtuar në Kroaci. Ministria thotë se është bërë kallëzim penal për grumbulluesit dhe gjobë e bllokim aktivitetit për ata që rezultuan me shkelje.
Më tej, theksohet se nga autoritetit kryhen inspektime të vazhdueshme, analiza të rregullta laboratorike dhe ndjekje e gjurmueshmërisë, që kanë për qëllim të sigurojnë standardet e larta në prodhimin dhe tregtimin e mandarinave dhe produkteve të tjera. Së fundi bëhet edhe një thirrje për konsumatorët dhe fermerët për të raportuar çdo rast të paligjshmërisë për të mbrojtur integritetin e zinxhirit të furnizimit ushqimor.
Thirjes i është përgjigjur menjëherë Presidenti i Urdhrit të Mjekut Veterinar, Ervin Resuli, i cili ka denoncuar një tjetër rast ngarkese me pesticide të larta në mandarina nga Shqipëria, i sinjalizuar nga sistemet e BE-së.
Kjo është zbuluar nga sistemi i alarmit RASFF në BE për praninë e pesticideve të larta në mandarinat nga Shqipëria.
Sipas tij ministria e Bujqësisë po hesht, ndërsa ky është një sistem alarmi.
Ende pa u mbyllur mirë rasti i tre ngarkesave të para për praninë e clorpirifosit në mandarina, sistemi i alarmit RASFF në BE ka lëshuar përsëri njoftim më 20 dhjetor për një tjetër ngarkesë.
Resuli ngre pyetjen: Ku është Ministria e Bujqësisë?
“Ministria ka për detyrë të mbrojë konsumatorin shqiptar dhe të sigurojë standardet e sigurisë ushqimore. Pse po vonohen analizat dhe nuk po publikohen rezultatet? A ka dikush interesa në Ministrinë e Bujqësisë që lejon popullatën shqiptare të konsumojë produkte me nivele të rrezikshme të pesticideve?”, thekson ai.
