Lidhja e re hekurudhore me shpejtësi të lartë do të jetë funksionale deri në vitin 2026, në marrëveshje me Deutsche Bahn dhe ÖBB.
Italia do të nisë një lidhje të re hekurudhore me shpejtësi të lartë midis Gjermanisë dhe Austrisë deri vitin e ardhshëm, njoftoi kompania shtetërore italiane e hekurudhave, Trenitalia.
Ky hap, pjesë e rrjetit hekurudhor me shpejtësi të lartë ‘Metroja Evropiane’, vjen pas një marrëveshjeje mes Trenitalia (Grupi FS), kompanisë gjermane të hekurudhave Deutsche Bahn (DB) dhe operatorit austriak ÖBB.
Shërbimi i ri ndërkufitar që lidh Romën dhe Milanon me Mynihun do të aktivizohet deri në vitin 2026 dhe do të zgjerohet gradualisht deri në Berlin dhe Napoli nga dhjetori i vitit 2028, thuhet në një deklaratë të Grupit FS.
Gianpiero Strisciuglio, CEO dhe drejtor i përgjithshëm i Trenitalia-s, tha se lidhja e Italisë me qytetet kryesore evropiane me tren është “një nga objektivat strategjikë” të Grupit FS, me qëllimin që Frecciarossa të bëhet “treni i evropianëve dhe jo vetëm i italianëve”.
Lidhja hekurudhore midis Italisë, Austrisë dhe Gjermanisë është përzgjedhur nga Komisioni Evropian si një projekt pilot, në kuadër të përpjekjeve për të përmirësuar ofertën ndërkombëtare të transportit dhe për t’iu përgjigjur kërkesës në rritje për udhëtime të qëndrueshme midis vendeve evropiane.
Shërbimi i ri do të nisë me katër lidhje që bashkojnë Mynihun me Milanon dhe Romën.
Në linjën Milano-Mynih, me kohë udhëtimi prej gjashtë orë e gjysmë, ndalesat kryesore do të jenë në Brescia, Verona, Rovereto, Trento, Bolzano dhe Innsbruck.
Rruga Romë-Mynih, me kohë udhëtimi prej tetë orë e gjysmë, do të ndalet në Firence, Bolonja, Verona, Rovereto, Trento, Bolzano dhe Innsbruck.
Hapja e Tunelit Bazë të Brenner-it, e planifikuar për vitin 2032, do të reduktojë kohën e udhëtimit me rreth një orë, tha Grupi FS.
Nga dhjetori i vitit 2028, shërbimi do të përfshijë 10 lidhje midis Italisë dhe Gjermanisë, duke mbuluar rrugët: Milano-Mynih, Milano-Berlin, Romë-Mynih, Napoli-Mynih dhe Napoli-Berlin.
Shërbimi i ri do të operohet me Frecciarossa 1000, treni me shpejtësi të lartë i Trenitalia-s, i projektuar për të udhëtuar në Itali dhe në rrjete të tjera hekurudhore evropiane, duke qenë në gjendje të përballojë ndryshimet në furnizimin me energji elektrike dhe sinjalizimin në vende të ndryshme.
Lidhja e re Frecciarossa me Gjermaninë dhe Austrinë do t’u mundësojë gjithashtu udhëtarëve të lidhen me shumë destinacione të tjera hekurudhore, përfshirë Frankfurtin dhe Krakovën.
Në shtatorin e kaluar, ministri italian i transportit Matteo Salvini përurtoi trenin e ri të natës ÖBB Nightjet, i cili lidh Romën me Vjenën për 16 orë, ndërsa në fillim të këtij viti Grupi FS njoftoi planet për të nisur një shërbim hekurudhor me shpejtësi të lartë midis Londrës dhe Milanos deri në vitin 2029.
