Kryeministri Edi Rama, në fjalën përmbyllëse pas diskutimeve të Ditës së Parë të Dialogut për Bujqësinë dhe Zhvillimin Rural mes fermerëve dhe sipërmarrësve në bujqësi, tha sot se duhet të pezullohet veprimtaria e Agjencisë Kombëtare të Ushqimit.
Rama tha se AKU duhet të pezullohet me urgjencë, pasi sipas kreut të qeverisë, më shumë bën dëm sesa mirë.
“Menjëherë duhet të pezullohet veprimtaria e AKU-së. AKU duhet ndaluar me urgjencë që të vazhdojë të veprojë, sepse më shumë sesa mirë, bën dëm. Duhet pezulluar AKU-ja, duhet ngritur një komision i posaçëm për të marrë në analizë të gjitha burimet njerëzore të AKU-së dhe procesi i bashkimit të inspektorateve të ndryshme, që është vendosur me ligj, duhet të kalojë nga një proces i seleksionimit të burimeve njerëzore që do të merren me inspektimet dhe këtu do të ftohet të jetë pjesë edhe Universiteti Bujqësor, për të bërë një vlerësim serioz të burimeve njerëzore të AKU-së.
Është shqetësimi më i madhi gjithë sipërmarrësve, jo vetëm të atyre që janë në sektorin e bujqësisë, por është shqetësim për gjithë restorantet, kafenetë dhe pikat e tregtimit, sepse më shumë se bën mirë, bën dëm. AKU-ja, ministre, duhet nxjerrë urdhri i pezullimit të veprimtarisë së AKU-së totalisht”, u shpreh Rama.
