Pas paralajmërimeve publike të bëra pak ditë më parë, Kryeministri Edi Rama, ka shkuar sot edhe më tej, duke u bërë thirrje qytetarëve që të denoncojnë noterët dhe avokatët që ju kërkojnë pagesë për shërbimet në e-Albania. Pjesa më e madhe e shërbimeve në e-Albania janë falas për qytetarët, me përjashtim të rasteve të veçanta kur parashikohet ndryshe.
Kryeministri theksoi se nuk mund t’u kërkohen tarifa qytetarëve, pasi kjo është në shkelje të ligjit, pasi ai është një shërbim publik, i cili duhet të ofrohet përmes zyrave të bashkive në vend.
“Është në shkelje të ligjit dhe mund të denoncohet pranë institucioneve përkatëse e sanksionohet deri në heqjen e liçencës”, shkruan Rama.
Kreu i qeverisë u shpreh se të gjithë qytetarët që kanë nevojë për asistencë në përdorimin e platformës e-Albania për shërbime të caktuara mund t’i drejtohen në çdo qytet zyrave të bashkive, si dhe njësive administrative përkatëse, për të marrë shërbimin e kërkuar falas.
Postim i kryeministrit Edi Rama:
Të gjithë qytetarët që kanë nevojë për asistencë në përdorimin e platformës e-Albania për shërbime të caktuara, mund t’i drejtohen në çdo qytet zyrave të bashkive, si dhe njësive administrative përkatëse, për të marrë shërbimin e kërkuar, FALAS
Çdo subjekt privat (noter, avokat apo zyrë tjetër) që kërkon pagesë për shërbime të ofruara nga e-Albania është në shkelje të ligjit dhe mund të denoncohet pranë institucioneve përkatëse e sanksionohet deri në heqjen e liçencës
