Banka e Shqipërisë bën të ditur se, në 3-mujorin e parë të këtij viti shënoi rritje edhe portofoli i kredive të dhëna nga sektori bankar shqiptar për subjekte jashtë vendit.
Sipas BSH-së, në tre mujorin e parë të këtij viti kredia për subjektet jorezidente u zgjerua me 3.2%. Ndërsa totali i kredisë për këtë kategori u rrit me 40% gjatë vitit të kaluar, në shifrën e 27 miliardë lekëve.
Të dhënat e Bankës së Shqipërisë tregojnë se, raporti i kredive me probleme në segmentin e huasë për jorezidentët vitin e kaluar zbriti në 0.3%, nga 1.7% që kishte qenë një vit më parë.
Portofoli i kredisë për jorezidentët përfaqësohet kryesisht nga kredia e dhënë për bizneset e huaja në monedhën euro.
Të dhënat e Bankës së Shqipërisë tregojnë se, për momentin huadhënia e bankave shqiptare jashtë vendit paraqitet me parametra cilësorë pozitivë.
